Sekretáriu Estadu ba Komunikasaun Sosiál, Merício Juvinal dos Reis “AKARA”, hato’o afirmasaun ne’e bainhira hato intervensaun ba jornalista sira iha semináriu diskursu publiku ho jornalista sira, Tersa-feira, loron 15 fulan-Novembru, tinan-2022, iha salaun Pusat Budaya Indonésia , Kintál-Boot, Dili.
Merício Juvinal dos Reis “AKARA”, apresia Telkomsel sai hanesan parseiru di’ak ida liuliu investór di’ak iha área komunikasaun.
“Ha’u nia apresiasaun ba Embaixada Indonésia iha Timor-Leste, ne’ebé mak parseiru di’ak tebes durante ne’e, liu liu ho presensa empreza Telkomsel nian hodi apoiu no fasiliita servisu jornalista nian nomos koperasaun oioin”, dehan “AKARA”.
“AKARA”, mós informa maske iha difikuldade iha área infreastrutura hanesan internet ne’ebé la’o neneik liu, maibé operadór hanesan Telkomsel sempre kontinua oferese internet hodi uza ho di’ak durante halao operasaun iha Timor Leste.
Ezekutivu salienta liutan katak, tanba Governu sei asumi responsabildade halo projetu boot ida Fibra Optika ne’ebe hahu prosesu dahuluk hodi aselera internet ne’ebe lais no baratu liu, tuir planu iha tinan 2023-2024 faze dahuluk remata ona bele ona fornese internet lalais no baratu ajuda mos operador Telkomsel, Telemor no Timor Telekom, hodi fornese internet ne’ebe diak liu no baratu ho kualidade a’as.
Ho presensa empreza Telkomsel nian iha Timor Leste konsege halo mudansa ba sidadaun tamba lori besik internet ne’ebe lais.
Desde empresa Telkomsel hala’o nia operasaun iha Timor Leste sidadaun barak maka utiliza telephone matenek (smartphone) ne’e sinál di’ak tebes tamba lori sidadaun barak hakbesik ba mundo no hetan matenek oioin.
Relasiona ho empresa Telkomsel nia atividade kona ba kompetisaun hakerek ba jornalista sira,nomós diskursu públiku (public speaking) ida ne’e hanesan, kontribuisaun ida ke diak no apresia inisiativa ida ne’e, tanba ho kompetisaun hirak ne’e bele hasa’e média sira nia kualidade entre jornalista hodi bele hatudu sira nia talentu, kapasidade. Ida ne’e mak hanaran Governu ho seitór privadu sira funsiona no tulun malu kapasita servisu média.
SEKOMS mos husu ba empresa Telkomsel atu apoiu aktividades SEKOMS nian durante ne’e hodi minimiza lia falsu(HOAX) no promove nafatin informasaun lo’os ba komunidade.
Iha tinan oin Timor-Leste sei hasoru festa demokrasia, nune’e apela nafatin ba media nain ho jornalista atu promove paz, harmónia no sai hanesan ajente inspirador, nafatin neutro hodi halao tuir kode etika jornalista nia Hateten “AKARA”.
Governante ne’e mos husu ba Governu Indonésia atu apoiu Timor-Leste nia preparasaun nune’e iha futuru bele sai membru Asean iha futuru.
Iha fatin hanesan Embaixadór Indonesia ba Timor Leste, Okto Dorinus Manik hateten sente kontente hamutuk ho empreza Telkomsel ne’ebé nain maka Governu Indonésia hodi hala’o investe iha área komunikasaun maske rede dalaruma ladun fo satisfasaun ba klientes sira.
Husi istória no kulturalmente Timor-Leste ho Indonésia hanesan maun alin, ba futuru sempre apoiu malu hodi dezenvolvimentu ba oin liu husi informasaun no komunikasaun hodi kapasita sidadaun sira nia pensamentu. Tenik “Manik”
Semináriu ne’e organiza husi Empresa Telekomsel no partisipa husi Embaixadór Indonésia iha Timor-Leste, Prezidente Konsellu Imprensa, Virgillio Guterres, representante journalista husi Media, Loluwari,Timor Post, Lafaek News, Naunil news, Tve, Smnews, nomos reprezentante média seluk ne’ebé latemi naran ida – idak.
Comment