𝐒𝐄𝐊𝐎𝐌𝐒 𝐩𝐫𝐨𝐧𝐭𝐮 𝐤𝐨𝐥𝐚𝐛𝐨𝐫𝐚 𝐡𝐨 𝐦𝐞́𝐝𝐢𝐚 𝐏𝐑 𝐢𝐡𝐚 𝐚́𝐫𝐞𝐚 𝐊𝐨𝐦𝐮𝐧𝐢𝐤𝐚𝐬𝐚𝐮𝐧 𝐥𝐢𝐠𝐚-𝐛𝐚 𝐄𝐯𝐞𝐧𝐭𝐮 𝐅𝐞𝐬𝐭𝐢𝐯𝐚́𝐥 𝐊𝐮𝐥𝐭𝐮𝐫𝐚 𝐧𝐨 𝐃𝐞𝐬𝐩𝐨𝐫𝐭𝐮 𝐧𝐞’𝐞𝐛𝐞́ 𝐨𝐫𝐠𝐚𝐧𝐢𝐳𝐚 𝐡𝐮𝐬𝐢 𝐏𝐑 𝐬𝐞𝐢 𝐡𝐚𝐥𝐚’𝐨 𝐢𝐡𝐚 𝐭𝐞𝐦𝐩𝐮 𝐛𝐞𝐬𝐢𝐤.

Sekretáriu Estadu ba Komunikasaun Sosiál, Merício Juvinal do Reis “AKARA”, hateten, Governu sempre prontu hodi kolabora wainhira Xefe Estadu iha hanoin ruma atu halo. No sempre apresia vizaun ideia polítika Prezidente Repúblika Demokratika Timor-Leste, Dr, José Ramos-Horta nian.

Afirmasaun ne’e hato’o husi Merício Juvinal do Reis “AKARA”, bainhira simu aúdensia ida husi Assesor Média Prezidente Repúblika Timor Leste, Augusto Junior Trindade ho nia ekipa, kinta-feira, loron 15 fulan-Setembru, tinan-2022, iha sala reuniaun SEKOMS, Palásiu Governu, Dili.

Ezekutivu ne’e informa katak, média Gabinete SEKOMS prontu kolabora no asumi responsabilidade iha área komunikasaun hodi divulga no transmite informsaun ba públiku iha eventu Festivál Kultura no Desportu ida ne’e.

“Hanesan membru Governu ne’ebé tau matan iha área komunikasaun sosiál, sei asumi responsabilidade hodi halo divulgasaun no sosializasaun makas ho nune’e ita komunidade no populasaun sira bele familiar polítika Prezidente nian. Para sira sente no sai nain ba prosesu dezenvolvimentu polítika no promosaun festivál kulturál no desportu Timor-Leste”, dehan “AKARA”.

Entertantu iha enkontru ne’e, SEKOMS konvida assessor média Prezidente ho nia ekipa atu bele priense programa Meet The Press, nune’e bele esplika politika PR nia ba média sira, liu-liu eventu festivál kulturál no desportu refere.

Assesor Média Prezidente Repúblika Timor Leste, Augusto Junior Trindade, hateten katak, ligadu ho inisiativa programa Prezidente Repúblika nian kona-ba “Festivál Kultura no desportu”, Inisiativa hasoru SEKOMS ne’e,hanesan papel Prezidente nian mak atu atu loke dalan ba Governu sira atu bele servisu ho di’ak no kria estabilidade nune’e Governu bele koopera ho di’ak.

Nia hateten, Tanba ne’e, Prezidente husu atu Governu liuhosi SEKOMS bele koopera ho di’ak no oinsá atu utiliza média sira hodi divulga informasaun iha rai laran no rai liur em termu ba komunikasaun, seguransa, ekonomia no turizmu iha rai laran.

Augusto Junior Trindade, agradese ba idea brillante sira husi SEKOMS ba envolvimentu jovem mileni atu halo promosaun no branding kona-ba Timor ba mundu liu husi kontent kreator (youtuber).

Iha enkontru ne’e SEKOMS mós ko’alia kona-ba, kampaña literasia dijitál iha eskola Sekundária iha teritóriu Timor ne’ebé durante ne’e lao hela, ho nia objetivu. Ho nune’e SEKOMS hakrak konvida Sr. Prezidente Republika atu partisipa kampaña literasia dijitál refere hodi fó inspirasaun ba estudante sira kona-ba literasia dijitál ne’e tamba iha erá agora ne’e jovem sira tenke uza plataforma dijitál ho matenek no sivilizadu.

Enkontru ida ne’e mos koalia oinsá média PR no SEKOMS hodi promove potensialidade Timor-Leste iha mundu internasionál liu husi kanál telivizaun internasionál no Plataforma dijitál sira; ho ida ne’e SEKOMS sei follow-up ho Média sira husi Indonésia hanesan Transmedia group (CNN Indonesai, Trans TV, Trasn-7), Indosiar no seluk tan. ne’ebé fulan kotuk SEKOMS iha nia vizita ba média nasionál sira iha Indonésia ko’alia ona oinsá atu halo “Narasi kona-ba Timor-Leste no divulga iha sira nia kanál”, kapasitasaun rekursu umanu no ha’u bele koordena hodi joint entre média PR ho Transmedia group iha “Programa Adventure Trans-7”.

Exekutivu husu mós husi para media PR no SEKOMS halo Ekipa ki’ik hodi halo preparasaun tekniku no follow-up hodi aselera ita tempu besik.