KOMUNIDADE MAIÓRIA ASSESU BA MÍDIA RTTL-EP TUIR GMN-TV KOMPARA HO MÍDIA SIRA SELUK.

Sekretaria Estadu ba Komunikasaun Sosiál (SEKOMS) hala’o survey nasionál ba dala uluk kona-ba persepsaun publiku, tanba durante tinan barak nia laran Governu nunka halo peskiza ruma, atividade ida ne’e ho objetivu atu sukat assessu no fiar hosi komunidade liu-liu ba mídia estatál hanesan RTTL-EP , Tatoli-IP no Rádiu Komunidade. Mídia tolu ne’e maka durante ne’e Governu fó apoiu fundus liu hosi Transferensua Públiku.

Survey ida ne’e mós hakarak buka hatene oinsá públiku nia assessu no fiar ba plataforma mídia konvensionál hanesan, Televizaun, Rádiu no Jornál sira kompara mídia sosíal hanesan; Facebook, Instagram, Youtube no sel-seluk.

Rezultadu survey nasionál ida ne’e indika katak; Televisaun Timor-Leste hetan fiar liu, hosi publiku (70%) no GMN-TV (24%),Televisaun Maubere, STL-TV,TVE no Guardamor-TV hetan (5%-1%) ne’ebé laiha siknifikasaun kompara TVTL no GMN-TV.

Rezultadu Survey mós hatudu katak: Rádiu Timor-Leste sai preferensia di’ak liu (54%) hosi públiku tuir mai Rádiu Komunidade (34%), Rádiu GMN, Rádiu Maubere, Rádiu Liberdade no RTK hetan fiar menus (4%-1%) ne’ebé laiha signifikante atu kompete ho Rádiu Estatal no RAKOMS.

Hakarak atúaliza deit rezultadu survey ne’e katak públiku ninia preferensia hodi assessu ba Jornál maka hanesan tuir mai ne’e: Diáriu Nasionál (39%), Timor Post (34%), STL (8%) Jornál Independente (7%) no Business Timor (4%). Signifika DN no TP maka domina tebes kompara ho jornál sira seluk.

Iha survey nasionál ida ne’e Governu mós hakarak hatene no sukat preferénsia públiku kona-ba topiku informasaun maka hanesan politika nasionál (33%), ekonomia no negosiu (20%) informsaun Munisípiu no edukasaun Sosiál (14%) topiku sel-seluk hanesan sosio-kultura no politika internasionál no seluk hetan pursentu (8%-1%), Signifika maioria povu Timor-Leste sei prefere akompaña notísia polítika nasionál komapra ho notisia seluk.

Rezultadu survey mós hatudu katak; divulgasaun informasaun ho topiku sira ne’e, públiku prefere liu akompaña mídia estatatál no GMN-TV ho pursentu ne’ebé signifikante tebes maka; (56-60%) ba RTTL no (36-39%) ba GMNTV, Televizaun privadu sira seluk ho pursentu (2-1%) ne’ebé hatudu katak kompetisaun laiha liu hosi mídia privada sira seluk.

Rezultadu survey kona-ba assessu públiku ba fontes online hatudu katak komunidade asessu no fiar liu plata forma online; Facebook (37%) tuir mai maka you tube (31%), website (22%) no whatsaap (8%) signifika dadaun ne’e povu Timor-Leste dependente maka’as ba mídia online.

Iha survey ida ne’e ita sukat mós frequensia públiku asessu ba mídia komunikasaun ne’ebé hatudu katak hosi respondentes hamutuk 1002, nain 762 ou (76%) maka loron-loron assessu ba mídia komunikasaun no dala ruma deit ne’e ho pursentu kikuan tebes hanesan; loron 3 dala 1 (8%) semana 1 dala 1 mós (8%) nunka uza no fulan 1 dala 1 ne’e (4%) deit.

Estabilidade no nasaun forte depende ba oinsá atu jere informasaun públiku tanba ne’e mai ita investe ita nia tempu hodi assessu ba mídia komunikasaun.

Bazea ba rezultadu Peskiza refere, SEKOMS husu Instituisaun Mídia sira atu fornese informasaun ne’ebe klaru ba Komunidade Sira nune’e bele aumenta persentazem iha futuru.

Sekretáriu Estadu ba Komunikasaun Sosiál, Merício Juvinal dos Reis “AKARA”, hateten katak Survey ne’ebé SEKOMS hala’o iha teritóriu Timor laran tomak ho objetivu katak atu hatene porsentu hira populasaun konsumu informasaun husi mídia estatál no mídia privadu

“AKARA”, afirma tan, SEKOMS hala’o Survey ne’e hodi identifika populasaun ka sidadaun asesu informasaun barak liu husi mídia estatál ka privadu atu nune’e Governu bele apoia mídia sira hotu ne’ebé eziste iha rai laran hodi nune’e bele divulga imformasaun ne’ebé saúdavel kredivel no los ba iha komunidade iha rai laran no mós iha estranjeiru.

Iha Fatin hanesan Ezekutivu husu Instituisaun Mídia sira hotu atu fornese imformasaun ne’ebe klaru no justu ba Komunidade Sira.

“Mídia Mak sai hanesan Liman ain estadu no ema hotu-hotu nian hodi públika ba públiku espresaun, atividade, talentu servisu hotu ne’ebé ita hala’o iha moris loron-loron, liu-liu iha atividade Governu nian ba Dezenvolvimentu estadu no ba rai ida ne’e.

Survey ne’e hala’o maske seidauk maximu maibé iha informasaun sufisiente hodi fornese ba públiku atu garantia informasaun hotu ne’ebé mídia sira fornese ba Ita hotu”.

Governante ne’e realsa, ba oin SEKOMS nafatin servisu hamutuk ho mídia sira hotu atu garantia kualidade informasaun ne’ebe di’ak liu ba públiku.

Iha fatin hanesan, Tékniku Profisionál Mídia SEKOMS, Carsiliano Oliveira hamutuk ho Asesora Jurídika SEKOMS no Diretór DNPDML, halo konferénsia Imprensa ida ba jornalista sira kona-ba rezultadu Persepsaun Públiku ba Mídia Estatál no Mídia Privada, iha segunda-feira, loron 25 fulan-outubru, tinan 2021, iha sala reuniaun SEKOMS, Palásiu Governu, Dili.

Nia esplika katak Survey ne’e halo hanesan sasukat ida ba mídia sira hotu atu mídia ida-idak hatene sira nia obra rasik.

“Levantamentu ne’ebé SEKOMS hala’o ne’e fo inspirasaun di’ak ba mídia Sira atu bele haboot Liu tan Sira nia informasaun ba Públiku Liu husi programa ka atividade ne’ebé mídia sira fornese” dehan Carsiliano.