Koordenadór Forsa Tarefa ba Prevensaun no Mitigasaun Surtu COVID-19, Sergio Lobo hateten katak maioria husi ita nia pasiente pozitivu COVID-19 iha Sentru Saude Vera-Cruz lahatudu ona sintomas. Maske nune’e rezultadu hatudu katak porsentu 80% husi ema sira ne’ebe lahatudu sintomas bele teste pozitivu no bele transmite virus ba ema seluk, tamba ne’e tenke hela iha izolamentu.
Sergio Lobo hato’o asuntu ne’e hodi hatan ba preokupasaun publiku ne’ebe dehan katak ema sira ne’ebé oras ne’e dadaun hela iha izolamentu Vera-Cruz, lahatudu sintomas moras COVID-19 nian no sira diak hela iha Izolamentu.
“..konaba maluk sira ne’ebé la moras maibe teste positive, ida ne’e esplika bebeik ona katak bele to’o 80% ema ne’ebé pozitivu maibe laiha sintomas, maibe mesmo nia laiha sintomas nafatin iha potensialidade atu transmite moras ne’e ba ema seluk, tamba ne’e mak tenke ba hela iha fatin izolamentu…” Sergio hatutan.
Hodi hatan ba preokupasaun seluk ne’ebé sai iha media sosial katak, rezultadu ema pozitivu fo sai uluk iha media antes lori ema pozitivu ba izolamentu, porta-voz ne’e hateten, rezultadu hotu depende ba konfirmasaun husi Austrália, tamba dala ruma mai iha horas ne’ebé atu halo anunsio, nune’e anunsia uluk mak ba foti sira ba izolamentu, maibé ida ne’e akontese dalaruma de’it. Dalabarak ambulánsia ba foti iha dader antes publikasan iha media iha lokraik.
Razaun seluk kona ba ambulánsia ne’ebé la lori oksijéniu no la lori fasilidade seluk tanba maioria ema sira la hatudu sintomas no la hatudu moras ruma maibé tenke lori ambulánsia atu garante prevensaun transmisaun bae ma seluk.
Aproveita biban ne’e, ex-ministru saúde ne’e apelu ba ema hotu atu fiar de’it ba informasaun ne’ebé fó sai husi sala situasaun Sentru Integradu Jestaun Krize, kontinua tau fiar ba Governu ne’ebé lidera prosesu prevensaun no mitigasaun moras COVID-19, kolabora no partisipa ho dixiplina iha distansiamentu sosiál, distansiamentu fíziku no ijiéne pesoál no evita liman labele kona ba ibun, inus no matan bebeik.
Porta-voz ne’e mós deklara, moras COVID-19 la’os hanesan moras ba’in bain tanba nia da’et husi ema ida ba ema seluk lalais tebes nune’e nafatin kumpri regra husi ministériu saúde no Organizasaun Saúde Mundiál (OMS) no koopera iha luta ba kontra COVID-19.
Remata
Comment