Ministru Interinu Asuntu Parlamentár no Komunikasaun Sosiál, Merício Juvinal dos Reis “AKARA”, partisipa iha reuniaun Konsellu Ministru, kuarta-feira, loron 06 fulan-Marsu, tinan-2022, iha sala reuniaun PM-Palásiu Governu, Dili.
Iha sorumutuk Konsellu Ministru aprova Rezolusaun Governu nian, ne’ebé aprezenta husi Primeira-Ministra ein ezersísiu, Sra. Armanda Berta dos Santos, ne’ebé fiksa vaga sira ba promosaun pesoál integradu iha Rejime Jerál husi Karreira sira Administrasaun Públika nian ba tinan 2022.
Husi totál vaga 866 ba promosaun, ne’ebé define iha Rezolusaun Governu ida-ne’e, 41 ba Tékniku Superiór – Grau A, 122 ba Tékniku Superiór – Grau B, 190 ba Tékniku Profisionál – Grau C, 250 ba Tékniku Profisionál – Grau D, 164 ba Tékniku Administrativu – Grau E no 99 ba Asistente – Grau F. Vaga sira ne’e destina ba promosaun ne’ebé tinan-tinan Governu fiksa, liuhusi proposta Komisaun Funsaun Públika nian, to’o limite 10% husi totál ema ba kada kategoria ka grupu profisionál.
Konsellu Ministrus delibera atu autoriza Ministru Finansas, Sr. Rui Augusto Gomes, atu negosia ho Banku Mundiál kona-ba kondisaun espesífika sira ba empréstimu hodi finansiamentu projetu fornesimentu bee moos ba sidade Dili. Projetu ne’e ho objetivu atu aumenta área kobertura ba servisu abastesimentu bee moos no hadi’a kapasidade institusionál BTL.EP nian. Projetu ne’e ho valór totál dolar amerikanu millaun 123,37, iha ne’ebé USD 120,76 mai husi empréstimu ne’e rasik. Projetu ne’e ho durasaun tinan 7, hahú husi tinan 2023 to’o 2029 no sei benefisia ba ema naín 82.300 husi munisípiu Dili nian.
Ministra Saúde, Sra. Odete Maria Freitas Belo, halo aprezentasaun ida kona-ba faze oin-oin husi projetu no kona-ba pontu situasaun no preparasaun ba prosesu aprovizionamentu ba projetu konstrusaun bloku pediatria no kuidadus intensivus iha Hospitál Nasionál Guido Valadares (HNGV). Bloku ospitalár ne’e sei iha andar lima no área ho luan besik metru kuadradu rihun haat. Bloku foun ne’e sei oferese instalasaun ne’ebé adekuadu ba nesesidade sira husi númeru pasiente nian ne’ebé aumenta ba beibeik iha HNGV, hodi hadi’a kualidade prestasaun servisu iha país ne’e.
Vise-Ministru Administrasaun Estatál, Sr. Lino de Jesus Torrezão, aprezenta ba Konsellu Ministrus opsaun polítiku-lejizlativa kona-ba inisiativa kriasaun polítika nasionál ba arkivu públiku no privadu sira. Inisiativa lejizlativa ida-ne’e ho objetivu atu implementa polítika arkivista nasional, ho estabelesimentu no definisaun ba prinsípiu ne’ebé sei orienta jestaun arkivu, la depende ba formatu, suporte no natureza informasaun ne’ebé kontein iha dokumentu sira instituisaun públika no privada nian.
Ikusliu, Ministru Koordenadór Assuntus Ekonómikus, Sr. Joaquim Amaral, halo aprezentasaun ida kona-ba progresu sira ne’ebé alkansa ona iha prosesu adezaun ba Organizasaun Mundiál Komérsiu (OMK).
Aprezenta mós nesesidade apoiu iha nivel polítiku no tékniku, ba prosesu adezaun nian, liuliu atu aselera elaborasaun ba lejizlasaun pendente no reforma interna sira, hodi fasilita atividade komersiál sira no kria ambiente ida favoravel ba setór privadu, nasionál no estranjeiru, nune’e bele kumpre prinsípiu jerál OMK nian. Aprezenta mós roteiru indikativu ida iha faze prosesu tuirmai atu nune’e to’o tinan-nia rohan prosesu adezaun Timor-Leste bele konklui ona.
Comment