DILI (MÍDIA SECOMS) — Sekretáriu Estadu Komunikasaun Sosiál, Expedito Loro Dias Ximenes, ofisialmente aprezenta Prezidente foun Rádio e Televisão de Timor-Leste, EP (RTTL), Rosario da Graça Maia, ba lideransa no pesoál sira iha serimónia ne’ebé hala’o iha edifísiu RTTL nian iha Caicoli, Dili, tersa-feira (03022026). Eventu ne’e marka inísiu tranzisaun lideransa nian iha emisora públika nasionál.
Iha ninia intervensaun, Expedito Loro Dias Ximenes subliña importánsia apoiu koletivu hosi elementu hotu-hotu instituisaun nian hodi garante lideransa foun bele hala’o ninia mandatu ho efetivu. Nia subliña, dezempeñu RTTL nian tenke aliña ho interese estadu no enkuadramentu legál ne’ebé aplikavel, partikularmente Lei No. 42 tinan 2008, ne’ebé regula RTTL nia transformasaun ba empreza públika. Nia hatete katak kumprimentu ba regulamentu sira maka xave ida atu hametin governasaun no profisionalizmu instituisaun nian.
Sekretáriu Estadu mós subliña katak períodu inisiál lideransa Prezidente foun nian sei foka liu ba adaptasaun ba ambiente servisu nian. Durante fulan tolu dahuluk períodu RTTL nian, hein katak Prezidente RTTL sei hala’o konsolidasaun interna, rona input hosi unidade oioin, no identifika aspetu sira ne’ebé presiza hadi’a no programa sira ne’ebé tenke kontinua hodi hasa’e kualidade servisu públiku.
Rosario da Graça Maia, hato’o ninia kompromisu atu harii kooperasaun inkluzivu ho ekipa tomak. Nia subliña ninia rejeisaun ba formasaun grupu interese sira iha instituisaun estadu nia laran no koloka interese nasionál nu’udar baze primária iha esforsu atu avansa RTTL nu’udar mídia públiku ida ne’ebé kredivel no kompetitivu.
Iha biban hanesan, Prezidente RTTL sesante, Elizeu Isaack Fernandes, hato’o nia apresiasaun ba Governu Konstitusionál da-9 liuhosi Sekretáriu Estadu Komunikasaun Sosiál ba konfiansa ne’ebé fó ba nia hodi lidera RTTL kuaze tinan ida nia laran. Nia konsidera nia mandatu marka ho kooperasaun konstrutivu no realizasaun pozitivu.
Elizeu Isaack Fernandes subliña tan katak maski la iha ona kargu maibé nia nafatin iha kompromisu atu fó apoiu esternu ba sustentabilidade no susesu RTTL nian iha lideransa foun nia okos.
‘’ha’u hakarak hato’o agradesimentu liliu ba IX Governu konstituisional liu Sekretáriu Estadu komunikasaun Sosial Expedito loro Dias ximense ne’ebe fo konfiansa hodi nomeia hau iha konsellhu ministru, hodi lidera rttl,e.p hodi servisu hamutuk ho ita boot sira besik tinan ida nebe ho nia rezultadu susesu nebe natón’’ dehan Ilezeu isack Fernande.
Iha ámbitu serimonia aprezentasaun ne’e hetan partisipasaun hosi Sekretáriu Estadu Komunikasaun Sosiál, konsellu administrasaun, inklui Diretór Ezekutivu no Diretór Informasaun, no pesoál RTTL tomak, E.P., nu’udar símbolu kontinuidade lideransa no kompromisu fahe ba hametin papél radiodifuzaun públika iha Timor-Leste.
Comment