S𝐄𝐊𝐎𝐌𝐒 𝐇𝐀𝐋𝐀’𝐎 𝐒𝐎𝐑𝐔𝐌𝐔𝐓𝐔 𝐇𝐎 𝐌𝐀𝐍𝐀𝐍 𝐍𝐀𝐈𝐍, 𝐁𝐀 𝐊𝐎𝐌𝐏𝐄𝐓𝐈𝐒𝐀𝐔𝐍 𝐘𝐎𝐔𝐓𝐔𝐁𝐄𝐑 𝐓𝐈𝐌𝐎𝐑 𝐋𝐄𝐒𝐓𝐄, 𝐓𝐈𝐍𝐀𝐍 𝟐𝟎𝟐𝟐

Díli – 19/12/2022, 𝐒𝐞𝐤𝐫𝐞𝐭á𝐫𝐢𝐮 𝐄𝐬𝐭𝐚𝐝𝐮 𝐛𝐚 𝐊𝐨𝐦𝐮𝐧𝐢𝐤𝐚𝐬𝐚𝐮𝐧 𝐒𝐨𝐬𝐢ál, 𝐌𝐞𝐫í𝐜𝐢𝐨 𝐉𝐮𝐯𝐢𝐧𝐚𝐥 𝐝𝐨𝐬 𝐑𝐞𝐢𝐬 “𝐀𝐊𝐀𝐑𝐀”, Hala’o Sorumutu ho Manan Nain ba Kompetisaun Youtuber. Programa ne’e SEKOMS deseña hodi fó oportunidade ba foinsa’e Timor Oan hotu, atu hanoin ho pensamentu matenek no kritiku, nune’e ajuda desenvolve Timor Leste ba oin, sorumutu neé realiza iha loron Segunda-feira, iha sala reuniaun SEKOMS, Palásiu Governu, Dili.

Objetivu husi hasoru malu ne’e oinsá hametin liu tan, lasu amizade ho manan nain ba kompetisaun youtuber tinan 2022, hodi kontinua mellora atividade Youtuber ba oin ho konteúdu oioin ba Timor-Leste nia di’ak, ba mundo nia matan.

𝐌𝐞𝐫𝐢́𝐜𝐢𝐨 𝐉𝐮𝐯𝐢𝐧𝐚𝐥 𝐝𝐨𝐬 𝐑𝐞𝐢𝐬 “𝐀𝐊𝐀𝐑𝐀”, hateten, juventude maka alizerse ba dezenvolvimentu Timor-Leste, nune’e Content Creator sira hotu hamosu nafatin konteúdu pozitivu no atrativu hodi promove Timor-Leste nia informasaun pozitivu ba mundu.

“Kada sidadaun ida bele halo saida deit, nafatin iha hanoin pozitivu hodi kontribui ba nasaun no sai diplomata no potensia di’ak ba nasaun” dehan “AKARA”.

SEKOMS mós husu atu Content Creator sira nafatin públika informasaun pozitivu nasaun nian ba mundu, atu nune’e nasaun sira seluk bele hare no hatene di’ak nasaun Timor-Leste.

Governante ne’e mós, hato’o apresiasaun, ba jovem foin sae sira ne’ebé, foin lalais tuir kompetisaun youtuber tinan-2022 husi programa SEKOMS nian, Governu iha interesse nafatin jovem sira, hodi hatudu kreatividade ne’ebé iha, prepara sidadaun sai matenek no kritiku, hodi uza plataforma dijitál ho karakter Umanismu ho pursentu ne’ebé boot, kompara ho konteúdu negosiu ou bisnis.

Entertantu Manan nain kompetisaun content creator sira hato’o agradese ba SEKOMS bele fó tempu uituan hodi bele troka ideias kona-ba plataforma dijitál liuhosi meius komunikasaun nian, nomós motiva jovem sira atu nafatin susesu iha futuru.

Manan nain ba kompetisaun “Content Creator” Youtuber Timor–Leste tinan 2022 ho karakter individu no grupo mak hanesan, António Ade de. A Xavier ho tema, Turismo Relijioza, Hipolito A.dos Santos ho tema Arte no kultura, Grupu Alfa Medic ho tema, Antibiotiku kura moras hotu-hotu, Grupu KNHS Internet Saudavel, THE GAJOG BOYS ho tema Kultura, António Pinto ho tema Seremonia inagurasaun uma lisan.

Iha sorumutu ne’e manan nain ba Content Creator sira husu atu kapasita sira nia aan, rejisto sira nia kanál Youtuber nune’e iha futuru bele halo kompetisaun di’ak liu tan no hetan rendimentu husi aktividade youtuber.

Iha futuru autór ba Content Creator nafatin produs konteúdu siénsia no halo mudansa ba karakter ne’ebé pozitivu hodi ajuda Governu dezenvolve seitór produtivu sira hotu ho lais.

Marka prezensa iha sorumutu neé maka Xefe Gabinete SEKOMS, Tékniku Espesializadu SEKOMS no Media gabinete.