SEKOMS Partisipa iha Reuniaun Sesaun Plenária.

Iha sesaun plenária ne’e, deputadu sira levanta preokupasaun kona-ba subsídiu akadémiku ba dosente universidade ne’ebé to’o ohin loron seidauk simu maske previstu iha orsamentu 2019 inklui subsídiu ba estudante iha rai li’ur no saláriu ba profesór kontratadu sira.

Alende ne’e, deputadu sira mós kestiona deklarasaun husi Primeiru-Ministru no Ministra Saúde ne’ebé hamosu konfuzaun kona-ba movimentasaun sidadaun hafoin simu vasina dala rua no balun tenki submete tan ba teste SWAB, inklui problema inan ida ho bebe ne’ebé mate tanba hetan atendimentu tarde husi profisionál saúde sira.

Iha biban ne’e, membru komisaun permanente sira mós lamenta ho servisu EDTL-EP hodi hatete katak hafoin transforma ba empreza públika, kondisaun sai piór liu tan kompara ho situasaun anteriór.

Alende problema subsídiu akadémiku no vasinasaun iha ámbitu COVID-19, problema subsídiu ba liña frente, infraestrutura bázika no seluk tan sai mós preokupasaun ne’ebé deputadu sira koloka iha plenáriu.

Hatan kona-ba subsídiu akadémiku, Sekretáriu Estadu ba Asuntu Komunikasaun Sosiál, Merício Juvinal dos Reis “AKARA” hateten prosesu pagamentu la’o dadaun no parte universidade sei aprezenta relatóriu, nune’e mós subsídiu individuál ba estudante sira iha rai li’ur sei iha prosesu atu halo pagamentu.

Relasiona ho deklarasaun husi Governu no Ministra Saúde kona-ba movimentasaun livre husi sidadaun ne’ebé simu ona vasina dala rua ne’ebé hamosu konfuzaun , SEKOMS hatete Primeiru-Ministru hanesan Xefe Governu, tanba ne’e deklarasaun saida de’it mak fó sai bazeia ba desizaun Konsellu Ministru hanesan desizaun ás liu hotu, tanba ne’e, Ema ne’ebé simu vasina dala rua livre atu asesu ba fatin hotu sein halo SWAB test, ezeptu iha kazu espesífiku ne’ebé sai hanesan razaun ba Ministériu Saúde atu kontinua aplika SWAB test uainhira nesesáriu.

Líder Másimu SEKOMS ne’e realsa, Xefe Governu koa’lia dala barak ona katak vasinasaun mak estratéjia ikus atu kombate COVID-19, tanba ne’e Governu sei enkoraja sidadaun hotu atu simu vasinasaun

Ba dadaun ne’e, parseiru sira husi Japaun no Austrália kontinua fó apoiu vasina Astrazeneca no UNICEF mós sei fasilita vasina tipu Pfizer nune’e bele atribui ba sidadaun ho tinan 12 to’o 17 tanba Governu iha planu atu normaliza kondisaun ekonómika no seluk tan uainhira taxa vasinasaun atinji ona porsentu 70 iha fulan-setembru no otubru.

Kona-ba observasaun katak hafoin transforma tiha ba empreza públika, EDTL ninia situasaun piór liu fali, AKARA afirma tuir perspetiva Governu nian, kondisaun ba dadaun ne’e di’ak liu tanba iha independénsia, profesionalizmu no desizaun rasik hodi jere empreza uainhira halo atendimentu.