Sekretáriu Estadu ba Komunikasaun Sosiál, Merício Juvinal dos Reis “AKARA”, hato’o afirmasaun ne’e, bainhira sai orador iha GRANDE Entervista, hodi ko’alia kona-ba loron mundiál Liberdade Imprensa, ho Tema jerál “Informasaun nu’udar Bem Públiku” no foku espesifiku ba oinsá Kombate HOAX, segunda-feira, 03 tinan 2021, iha estudio GMN-TV, Bebora, Dili.
Merício Juvinal dos Reis “AKARA” hateten, tantu Estadu, Governu no sosiedade iha espetativa atu simu informasaun ho kualidade aas husi jornalista sira hodi nune’e bele kontribui forma sosiedade ne’ebe sivilizadu.
“Iha kna’ar prinsipál ida jornalista, la’os fó deit informasaun maibé atu fó mós asistensia ba públiku hodi ajuda sira bele sai matenek liu no hetan prosesu sivilizasaun ida ne’ebé mak diak liu”, tenik “AKARA”.
Maibe “AKARA” preokupa tanba kualidade produtu jornalistiku Timor-Leste sei dook husi espetativa.
“Kompara ho nasaun viziñu rua, Ita sei-dok oituan, tanba iha fator tolu (3) tuir analiza SEKOMS iha, tanba jornalista balun seidauk konsidera katak produtu jornalistiku ne’e hanesan kreatividade intelektuál ida tenki iha responsablidade la’os naran hakerek no produz deit, presiza jornalista investigativu no presiza lee barak hodi domina asuntu ne’ebé ita atu relata ba publiku. Ita hatene katak rezultadu out put ne’e refleta nia kualidade intelektuál, jornalista ne’e profisaun ida ne’ebé mak la’os hanesan ema babain, estandar profisionalizmu iha kode etika, iha profisaun estudu ida, estuda atu sai jornalista entaun kualker produtu tenki asegura katak iha kualidade ass ho ninia produtu ne’e bele ajuda sidadaun sira,” dehan“AKARA”.
Governante ne mós kontinua husu ba Jornalista sira atu konsidera sira nia-aan hanesan parte ida husi prosesu sivilizasaun no produtu hotu-hotu tenki iha objetivu klaru hodi ajuda públiku, nune’e antes lansa ka públika produtu ruma tenki aplika prinsipiu sira hanesan akurasia, verifika lolos, cross-check no iha karakter ne’ebé edukativu.
Comment