DENPASAR-BALI (MÍDIA SECOMS) — Sekretaria Estadu Komunikasaun Sosiál (SEKOMS) hala’o Programa Media Tour 2026 durante loron tolu iha Bali, Repúblika Indonézia, nu’udar parte ida hosi ajenda inisiál Governu Konstitusionál da-9 hodi hametin kapasidade no rede mídia nasionál Timor-Leste nian.
Programa ne’e involve mídia nasionál 10 selesionadu, ne’ebé hetan oportunidade dahuluk atu partisipa iha atividade aprendizajen no troka esperiénsia ho instituisaun mídia sira iha rai-li’ur, partikularmente iha abordajen ba dezafiu sira kona-ba konverjénsia mídia no transformasaun dijitál.
Sekretáriu Estadu Komunikasaun Sosiál, Expedito Loro Dias Ximenes, haktuir katak Media Tour 2026 ho objetivu atu habelar orizonte jornalista Timor-Leste nian liuhosi observasaun direta ba prátika jestaun mídia nian iha Bali. Governante subliña importánsia atu komprende estratéjia adaptasaun mídia nian hodi mantein sustentabilidade, kredibilidade, no relevánsia iha dinámika globál.
Nia haktuir katak atividade ne’e konstitui mós diplomasia mídia, loke oportunidade ba kolaborasaun profisionál liuhosi fronteira. Iha situasaun globál ho aumentu informasaun falsa, polarizasaun informasaun, no konfiansa públiku ne’ebé tun, mídia iha responsabilidade atu harii kooperasaun konstrutivu ba benefísiu sosiedade nian.
Nu’udar parte hosi eventu ne’e, delegasaun mídia Timor-Leste simu hosi Taufan Pamungkas Mahaendra Jaya, Xefe Instituisaun Radio Difuzaun Públika Radio Republik Indonézia (RRI) Denpasar, ne’ebé hato’o nia apresiasaun ba vizita ne’e nu’udar dalan ida atu hametin relasaun entre emisora públika sira.
Aleinde ne’e, partisipante sira media tour nian mós vizita Bali Post, ida hosi mídia privadu prinsipál iha Bali, hodi aprende kona-ba jestaun editoriál, jestaun empreza mídia, no estratéjia dezenvolvimentu konteúdu iha era dijitál.
Mídia sira ne’ebé partisipa iha Programa Media Tour 2026 inklui jornalista hosi Jornál Independente, Jornál Timor Post, Jornál STL, Tatoli, IP, RTTL, E.P., SMNews, GMNTV, VIP TV, Dili Post, no SapNews.
Comment