Haree bá situasaun real ne’ebé oras ne’e akontese iha ita nia rai laran, prezensa Sekretáriu Estadu ba Komunikasaun Sosiál iha plenária hodi rona preokupasaun nomós informasaun ne’ebé hatutan husi distintus Deputadus sira bainhira hala’o fiskalizasaun kona-bá moras mundiál Covid-19.
Iha Pontus importante hirak mak hanesan :
– Husu ba Governu hodi fó kreditu ba eskola privadu sira, nune’e bele selu profesores sira nian salarius
– Hato’o ba parte kompetente hodi tau matan ba forsa atu keta halo agresaun fisiku ba Komunidade iha situasaun Estadu Emerjénsia
– Karik Lei fó dalan, Fó sai identidade husi pasiente ida ne’ebé rekopera ona husi moras Covid-19, nune’e nia bele fahe esperiensia ida ne’ebé durante ne’e nia hetan. Hodi públiku bele hatene no halo tuir atu bele prevene kazu ba moras refere labele aumenta ba bebeik.
– Foti medidas hodi aselera subsídiu ne’ebé mak Governu planeia ona atu rezolve povu nia halerik, liuliu ba povu kbi’it la’ek sira
– Tau matan ba subsidiu parte hirak ne’ebé hala’o sira nia kna’ar hanesan primeira liña durante situasaun Covid-19
Relasiona ho preokupasaun hirak ne’ebé hato’o husi Deputadu sira, Sekretáriu Estadu ba Komunikasaun Sosiál haktuir katak, “Governu sei seriu liutan hodi follow up asuntu hirak ne’e ba iha parte relevante. Maibé fó hanoin nafatin hodi apresia mós ba buat hirak ne’ebé mak Governu hala’o ona, tanba entre nasaun Asia sira hotu, Timor nian dadus ba Covid-19 ho númeru ida ne’ebé sei minimu. Tan ne’e Labele lakon orgullu ba ita nian nasaun rasik, se lae aban bainrua ita tauk no sei bele lalin malu ba hela iha ema nia rain”
Tersa, 21 Abril 2020
Comment