DILI (MÍDIA SECOMS) — Embaixadora Filipina iha Timor-Leste, Mary Anne Padua, iha Kinta (12 Fevereiru 2026) hala’o audiénsia ho Sekretáriu Estadu Komunikasaun Sosiál (SEKOMS), Expedito Loro Dias Ximenes, hodi ko’alia kona-ba dezenvolve kooperasaun mídia entre Filipina ho Timor-Leste.
Enkontru ne’ebé hala’o iha atmosfera ida ne’ebé manas no konstrutivu, subliña importánsia husi kolaborasaun estratéjika iha ámbitu komunikasaun sosiál, partikularmente iha kontestu knaar nasaun rua ne’e nian iha rejiaun Sudeste Aziátiku.
Iha diskusaun ne’e, Embaixadora Mary Anne Padua hato’o ninia apresiasaun ba Governu Timor-Leste, liu husi SEKOMS, ba ninia kompromisu hodi hametin kooperasaun bilaterál iha setór mídia.
Nia subliña papél sentrál hosi mídia iha harii komprensaun ne’ebé fahe, hametin ligasaun entre ema sira, no apoia divulgasaun informasaun ne’ebé loos no konstrutivu.
Entretantu, Sekretáriu Estadu Expedito Loro Dias Ximenes afirma, Governu Timor-Leste, liuhosi SEKOMS, iha tempu badak sei halo diskusaun téknika hodi prepara ba asina nota entendimentu (MoU) ho Governu Filipina.
Kolaborasaun ne’e planeia atu inklui hasa’e kapasidade ba jornalista sira, partikularmente iha profisiénsia lian Inglés.
“Iha tempu badak, ami sei halo diskusaun ho peritu tékniku sira hodi trasa Nota Entendimentu (MoU) ida hodi hasa’e kooperasaun entre mídia, Timor-Leste, no Filipina. Ida ne’e sei fó insight ba Filipina kona-ba oinsá atu lidera nu’udar prezidente ASEAN no hadi’a relasaun ema ba ema”.
“Ida ne’e sei envolve liuliu formasaun ba jornalista sira iha lian Inglés, nu’udar lian ofisiál ne’ebé ita hotu hatene Inglés Estadu membru ASEAN sira tanba ne’e, Embaixadór haksolok atu hasoru ita-boot sira,” esplika SEKOMS.
Diskusaun kona-ba kooperasaun ida-ne’e relevante liután tanba agora daudaun Filipina kaer prezidénsia ASEAN nian, enkuantu Timor-Leste ofisialmente sai membru permanente ASEAN nian iha tinan kotuk.
Iha kontestu ida-ne’e, mídia haree hanesan kanál estratéjiku ida hodi hato’o informasaun ba públiku kona-ba progresu dezenvolvimentu no dinámika kooperasaun entre nasaun rua ne’e.
Hein katak audiénsia ne’e sai nu’udar pasu dahuluk ba parseria ne’ebé besik liután iha ámbitu komunikasaun sosiál, enkuantu hametin integrasaun rejionál liuhosi hasa’e kualidade no profisionalizmu mídia nian iha Timor-Leste no Filipina.
Comment