Dili – 21/02/2023, Sekretaria Estadu ba Komunikasaun Sosiál, Kontinua Hala’o Kampaña Nasionál Kombate HOAX No Promove Internet Saúdavel Liuhosi Sensibilizasaun Literasia Dijitál, Iha Salaun Eskola Sekundária Colegio São José Operario, Balide, Tersa-feira ne’e.
Iha sensibilizasaun literasia dijitál ne’e, Sekretáriu Estadu ba Komunikasaun Sosiál, Merício Juvinal dos Reis “AKARA” hateten, kampaña literasia ida ne’e, hanesan kontinuasaun literasia dijitál ne’ebé hala’o ona iha eskola sira inklui mós eskola sira iha munisípiu sira, objetivu mak Governu konsidera era ida agora ne’e, era dijitál no importante tebes ba nasaun hotu hotu inklui Timor-Leste, tanba sei lori sivilizasaun foun mai rai ida ne’e no sei iha mudansa ba pensamentu, hahalok nomos iha vida moris.
“Era dijitál agora sei fó oportunidade mai sidadaun hotu, tanba atu assesu ba Plataforma dijitál ho mudansa globál ne’ebé mai husi rai dezenvolvidu sira. VIII Governu Konstitusional, liu husi SEKOMS sei la taka matan ba, mudansa globalizasaun nomós prepara sidadaun hotu, liuliu estudante sira, ne’ebé maka utiliza média sosiál ho Plataforma dijitál ho meius opera telephone matenek (smartphone), tenki ho pensamentu kritiku no matenek tanba iha informasaun pozitivu no negativu”, Hateten “AKARA”.
Estadu maka povu tamba povu iha mak hamosu estadu tamba ne’e estadu iha responsabilidade morál atu prepara sidadaun sira, nia mentalidade atu utiliza plataforma dijitál ho matenek hodi, kontribui ba dezevolvimentu Timor-Leste nian nomós promove Timor-Leste nia potensialidade ba mundu.
SEKOMS kontinua nafatin Kampaña Nasionál Kombate HOAX No Promove Internet Saúdavel liuhosi Sensibilizasaun Literasia Dijitál, ba Estudante Sekundária sira hotu, tanba maiória 70% maiória jovem, mak utiliza média dijitál, ho nune’e enkoraja no kapasita sira nia hanoin fo forsa ba sira iha pensamentu kritiku, hateten “AKARA”.
Tuir pontu de vista Governante ne’e katak, jovem sira hahú iha pensamentu kritiku no matenek hodi verifika fontes informasaun no verifika mos kredibilidade informasaun ne’ebé sira simu antes fahe tutan.
Lider Jerasaun foun akresenta liu tan katak, sei halo mós peskiza foun ida, depois de kampaña remata mak foin haree no aprezenta dadus, hodi haree liu ba mudansa tanba, téknolojia ne’e hanorin ema atu matenek, tanba literasia dijitál, hanesan inisiu ida atu fó hanoin ba jovem wainhira utiliza média sosiál ka plataforma dijitál tenki matenek nune’e automatikamente sidadaun sei aprende rasik.
Tuir Visé-Prezidente Parlamentu Nasionál, Maria Angelina Sarmento, ne’ebé sai mos orador ho tema, “Papel Jovem Mileniál no, oinsá atu uza Plataforma Dijitál ho Saúdavel hodi promove kreatividade iha ámbitu transformasaun dijitál iha Timor-Leste” hateten, normalmente téknolojia sei halo mudansa iha buat barak iha sosiedade nia leet. Dadus hatudu katak jovem barak mak assesu ba kampu trabalhador tamba asesu média sosiál.
“Jovem barak maka halo mudansa signifikante iha sira nia moris, familia no sosiedade, balansu no pozitivu tebes wainhira utiliza plataforma dijitál, hodi explora sira nia kretividade oioin, nune’e mos promove kreatividade hirak ne’e ba mundu”, Hateten Angelina
Orador datoluk ba iha 𝐊𝐚𝐦𝐩𝐚𝐧̃𝐚 𝐍𝐚𝐬𝐢𝐨𝐧𝐚́𝐥 𝐊𝐨𝐦𝐛𝐚𝐭𝐞 𝐇𝐎𝐀𝐗 𝐧𝐨 𝐏𝐫𝐨𝐦𝐨𝐯𝐞 𝐈𝐧𝐭𝐞𝐫𝐧𝐞𝐭 𝐒𝐚𝐮́𝐝𝐚𝐯𝐞𝐥 𝐥𝐢𝐮𝐡𝐨𝐬𝐢“𝐒𝐞𝐧𝐬𝐢𝐛𝐢𝐥𝐢𝐳𝐚𝐬𝐚𝐮𝐧 𝐋𝐢𝐭𝐞𝐫𝐚𝐬𝐢𝐚 𝐃𝐢𝐣𝐢𝐭𝐚́𝐥 𝐛𝐚 𝐄𝐬𝐤𝐨𝐥𝐚 𝐒𝐞𝐤𝐮𝐧𝐝𝐚́𝐫𝐢𝐚 Catolica 𝐒𝐚̃𝐨 𝐉𝐨𝐬𝐞́ 𝐎𝐩𝐞𝐫𝐚𝐫𝐢𝐨” Prezidente Interinu Konsellu Imprensa, Francisco Belo Simões, ne’ebé koa’lia kona-ba, Promove Liberdade Imprensa no Liberdade Espresaun iha ambitu transformasaun dijitál iha Timor-Leste hateten, iha Konstituisaun RDTL Asegura liberdade Imprensa no liberdade Espresaun hakerek iha artigu 40/41 asegura liberdade fo espasu ba ema hotu atu espresa nia liberdade.
“Ita nia Media Liberdade Imprensa tinan ne’e liberdade Imprensa sa’e boot liu kompara ho tinan kotuk 75 ho nasaun hotu tinan ne’e 17 signifika konsellu Imprensa haksoit dook numeru primeiru iha Sudeste Asiatiku iha Asia Timor-Leste maka primeiru lugar”, dehan Prezidente Interinu CI.
Orador dahaat ba iha 𝐊𝐚𝐦𝐩𝐚𝐧̃𝐚 𝐍𝐚𝐬𝐢𝐨𝐧𝐚́𝐥 𝐊𝐨𝐦𝐛𝐚𝐭𝐞 𝐇𝐎𝐀𝐗 𝐧𝐨 𝐏𝐫𝐨𝐦𝐨𝐯𝐞 𝐈𝐧𝐭𝐞𝐫𝐧𝐞𝐭 𝐒𝐚𝐮́𝐝𝐚𝐯𝐞𝐥 𝐥𝐢𝐮𝐡𝐨𝐬𝐢“𝐒𝐞𝐧𝐬𝐢𝐛𝐢𝐥𝐢𝐳𝐚𝐬𝐚𝐮𝐧 𝐋𝐢𝐭𝐞𝐫𝐚𝐬𝐢𝐚 𝐃𝐢𝐣𝐢𝐭𝐚́𝐥 𝐛𝐚 𝐄𝐬𝐤𝐨𝐥𝐚 𝐒𝐞𝐤𝐮𝐧𝐝𝐚́𝐫𝐢𝐚 Catolica 𝐒𝐚̃𝐨 𝐉𝐨𝐬𝐞́ 𝐎𝐩𝐞𝐫𝐚𝐫𝐢𝐨” mak Padre. Edgerio Martins SJ, ne’ebé koa’lia kona-ba Uja Plataforma Dijitál ho Saúdavel Tuir Perspetiva Igreija Catolica, hateten, hasa’e pensamentu kritiku iha parte Igreja nian, husi mundu teknolojia tama ba Era Dijitál tenki iha kapasidade kompriende ba situasaun.
“Uza plataforma Dijitá ne’ebé diak ho saudavel ita la gasta tempu ba kombate buat ida HOAX, maibé ita gasta tempu ba hasa’e ita nia koñesimentu kritiku atu ema labele bosok ita, tanba ita iha kakutak no prinsipiu rasik oinsa maka atu hasa’e pensamentu kritiku ba konsiensia ne’ebé kritika.”
Entertantu Visé-Diretór Colegio São José Operario, agradese ba SEKOMS bele lori kampaña Nasionál Kombate HOAX no Promove Internet Saúdavel liuhosi Sensibilizasaun Literasia Dijitál, ba Estudante Sekundária Colegio São José Operario, hodi hasa’e nafatin estudante nia koñesimentu liuhosi utiliza Plataforma dijitál ho matenek.
Comment