Sidadaun Timoroan hamutuk ualu nulu resin tolu (83), iha tersa-feira ne’e, fila hikas ba iha sira nia família no sosiedade hafoin kumpre ona loron sanulu resin haat iha konfinamentu obrigatóriu Otél Times Square, Otél SK no Otél Colmera, iha munisípiu Díli.
Diretór Nasionál Polítika no Kooperasaun husi Ministériu Saúde, Narcisio Fernandes, haktuir katak ema hirak ne’e la hatudu sintoma ruma relasionadu ho COVID-19 durante períodu kuarentena, tanba ne’e Ministériu Saúde deside reintegra ona sira ba família.
Narcisio Fernandes husu ba sidadaun hirak ne’e atu kontinua tau iha prátika atividade sira ne’ebé mak hala’o ona durante prosesu kuarentena bainhira fila ba uma, hanesan mantén nafatin distansiamentu sosiál no fíziku mínimu metru ida, fase liman bebeik no hakmatek iha uma, hodi kontribui ba prevensaun vírus ne’e iha ita nia an, ba família nomos ba komunidade.
….”ita boot sira nia misaun importante tebes, kontinua pratika atividade sira ne’ebé mak halo ona durante loron sanulu resin haat iha kuarentena laran, oinsa moris ho ijiene, aplika nafatin distansia sosiál no fíziku inklui hakmatek iha uma, hirak ne’e importante tebes…” haktuir Diretór Nasionál Polítika no Kooperasaun Ministériu Saúde.
Iha biban ida ne’e, Koordenador ba Destakamentu Reasaun Rápida husi Sentru Integradu Jestaun Krize, Aurélio Guterres, agradese partisipasaun husi Timoroan hirak ne’e iha prosesu tomak tanba konsege kumpre ona konfinamentu obrigatóriu iha instalasaun sira ne’ebé Estadu prepara no husu nafatin sira nia kolaborasaun hodi prevene transmisaun moras ne’e ba ema seluk.
“…mai ita hamutuk atu kontribui atu vírus ne’e lalika hadaet ba ema seluk liliu hahu husi ita nia família no sosiedade…” afirma Aurélio Guterres.
Entretantu, husi totál ema 83 ne’ebé sai husi kuarentena kompostu husi feto 33 no mane 50. Husi Otél Times Square hamutuk ema 36, Otél Sk 32 no nain 33 husi Otél Colmera.
Deskonfinamentu ne’e alende hala’o iha Díli, hala’o mós iha munisípiu sira seluk iha fasilidade sira ne’ebé Governu prepara iha loron ne’ebé hanesan.
Comment