BAUCAU (MÍDIA SECOMS) —Primeiru-Ministru (PM), Kay Rala Xanana Gusmão hala’o lansamentu bá projetu rehabilitasaun estrada urbana Baucau Vila no assiste direta serimónia asinatura kontratu entre Ministru Obras Públikas (MOP), Samuel Marçal ho na’in bá kompañia implementadór. iha Baucau Vila Antiga, sesta-feira (06/02/2026).
IX Governu Konstitusionál kontinua ho neneik maibé bebeik hala’o dezenvolvimentu liu-liu halo konstrusaun bá estrada bazeia bá Planu Estratéjiku Dezenvolvimentu Nasional (PEDN) períodu 2011–2030 ne’ebé aprova iha tinan 2011 hosi Parlamentu Nasionál (PN) ho objetivu hodi guia dezenvolvimentu Timor-Leste bá tinan naruk.
Objetivu prinsipál Governu Sentrál halo estrada bá munisípiu importante loos tanba bainhira estrada di’ak populasaun hosi suku bele la’o fásil bá sidade, bá merkadu, ospitál no eskola.
Iha deskursu Primeiru-Ministru husu bá populasaun iha munisípiu Baucau liu-liu joven sira atu kontribui hodi fó apoiu másimu bá empreza sira nune’e projetu ne’e bele ezekuta ho lalais tuir tempu ne’ebé determina ona iha kontratu.
“Ha’u apela bá kompañia rua ne’e atu servisu ho kualidade tanba estrada ne’e ita bo’ot sira halo bá povu liu-liu povu Baucau no povu mak sei uza. Fó-hanoin nafatin katak, osan ne’ebé uza bá projetu ne’e osan povu nian tanba sosa ho ruin no ran,” PM Xanana apela.
Iha fatin hanesan, Ministru Obras Públikas, Samuel Marçal esklarese katak, realizasaun asinatura kontratu no lansamentu bá rehabilitasaun estrada urbana Baucau Vila ne’e la’ós Ministériu Obras Públikas servisu mesak maibé esforsu kolektivu involve entidade oioin iha prosesu ne’e tomak.
“Ohin ita bele realiza serimónia bo’ot ida-ne’e la’ós tanba ha’u servisu mesak. Maibé, invole ekipa bo’ot ida kompostu hosi KAFI, KRO ho Prezidente mak ita-nia Primeiru-Ministru rasik, membru Governu hotu-hotu tanba hetan aprovasaun iha Konsellu Ministru, deputadu sira tanba aprova mós iha Parlamentu Nasionál inklui autoridade sira,” Ministru ne’e esklarese.
Iha povu Baucau nia oin, Ministru Obras Publikas Samuel Marçal hato’o agradesimentu wa’in bá populasaun afetadu sira ne’ebé prontu ona atu kolabora hodi oferese sira-nia ai-horis inklui kintál balun atu empreza bele hahú konstrusaun, ohin lansamentu signifika ohin mós hahú servisu.
“Tanba ne’e ha’u husu bá populasaun tomak, liu-liu bá joven sira atu kontribui bá prosesu konstrusaun ne’e. Labele halo impedimentu, bainhira presiza atu servisu favór hakbesik an bá empreza ko’alia didi’ak tanba empreza ne’e Timor-oan no Baucau oan,” Ministru ne’e husu.
Nune’e mós Prezidente Autoridade Munisípiu Baucau, Veneranda Eurico Marques Lemos Martins lori populasuan Baucau nia naran agradese bá IX Governu Konstitusionál lidera hosi Primeiru-Ministru, Kay Rala Xanana Gusmão ne’ebé realiza ona lansamentu bá rehabilitasaun estrada urbana iha Baucau Vila.
Rehabilitasaun estrada urbana pakote I (Seksaun 00+000-02+880.0 Ospitál Nagardjo- Baucau (Ospitál Rejionál Eduardo Ximenes), Munisípiu Baucau ho Kontratu; SSS/007/MOP – 2026, durasaun servisu fulan 24.
Projetu ne’e fiskaliza hosi Ministériu Obras Públikas ho montante orsamentu $4,735,021.55, responsabiliza hosi empreza Jova Construction Unipessoal Lda (Timor-Leste).
Alende ne’e, rehabilitasaun estrada urbana pakote III (Seksaun 1 – 5), Munisípiu Baucau Kontratu: SSS/008/MOP – 2026, durasaun servisu fulan 24, montante orsamentu $3,764,933.21 fiskaliza hosi Ministériu Obras Públikas, kontratór Vage’el Unipessoal Lda (Timor-Leste).
Serimónia ne’e assiste direta hosi membru Governu sira, membru Parlamentu Nasionál balun, reprezentante Banku Mundiál iha Timor-Leste, reprezentante Igreja lokál Baucau, autoridade lokál, estudante no populasaun.
Comment