Kriasaun Sentru Informasaun Suku importante atu fasilita interasaun entre Governu ho povu.
Sentru Informasaun Suku sai hanesan espasu ida hodi fasilita interasaun entre Governu ho povu no lori Governu besik ba povu.
Afirmasaun ne’e hato’o husi Sekretáriu Estadu ba Komunikasaun Sosiál, Merício Juvinal dos Reis “AKARA”, wainhira hala’o vizita ba Sentru Informasaun Suku Soelesu, iha Munisípiu Bobonaru, sesta-feira loron 17 fulan-jullu tinan 2020.
SEKOMS apresia vontade komunidade no autoridade lokál Suku Soelesu ne’ebé hakarak promove nafatin interasaun ho Governu.
“Oitavu Governu hakarak lori besik Governu ba ita nia komunidade. Tanba ne’e mak fasilita nafatin Sentru Informasaun Suku ne’e atu sai hanesan fatin ba interasaun entre Governu ho ita nia sidadaun no ha’u apresia ho komunidade no autoridade lokál sira tanba nafatin iha interasaun ho Governu”.
Ezekutivu ne’e afirma hafoin lansamentu Programa Naroman ba suku, atividade iha Sentru Informasaun Suku Soelesu lao di’ak to’o ohin loron no Sentru Informasaun Suku ne’e fasilita ona informasaun balun ba komunidade sira iha Suku ne’e.
Merício Juvinal dos Reis “AKARA”, realsa vizita ida ne’e ho intensaun atu hala’o diálogu komunitáriu no rona mós rezultadu husi atividade sira ne’ebé hala’o iha Sentru Informasaun Suku Soelesu, atu nune’e SEKOMS bele haree possibilidade ba oin atu fó apoiu ba Sentru Informasaun ne’e.
“Hau hanoin parte diálogu ida ne’e mak sei ajuda ita hotu, ajuda Governu, komunidade no autoridade lokál atu ko’alia ba malu nafatin, atu nune’e ita bele evita deskonfia malu, evita atu kondena malu no ita sei rezolve ita nia problema sira ne’e”, tenik SEKOMS.
Iha fatin hanesan, Prezidente Autoridade Munisípiu Bobonaro, Zeferino Soares, haktuir ho prezensa Sekretáriu Estadu ba Komunikasaun Sosiál iha fatin ida ne’e sei ajuda rezolve problema ne’ebé komunidade iha suku ne’e hasoru.
Aleinde ne’e, Xefe Suku Soelesu, Norberto So
Ares hateten, Juventude sira iha Suku ne’e sente kontente ho implementasaun Programa Naroman ba Suku iha sira nia suku tanba bele kapasita ona sira iha área jornalizmu nian.
Durante diálogu ne’e komunidade no lider komunitáriu hato’o mos sira nia preokupasaun ba Sekretáriu Estadu ba Komunikasaun Sosiál, liuliu relasiona ho estrada, eletrisidade, saúde, edukasaun no seluk tan.
Hatan ba preokupasaun hirak ne’e , Governante ne’e haktuir nia parte sei hato’o kestaun hirak ne’e ba Ministériu relevante sira hodi fó solusaun.
Comment