Servisu Autónumu Medikamentu no Ekipamentu Saúde (SAMES) distribui ekipamentu protesaun pesoál médiku ba Munisípiu sanulu resin-rua (12) no Rejiaun Administrativa Espesiál Oekusi-Ambeno iha loron 05 fulan-maiu tinan 2020.
Ekipamentu protesaun pesoál ne’ebé mak distribui hosi Servisu Autónumu Medikamentu no Ekipamentu Saúde (SAMES) ne’e hetan apoiu hosi Povu China hanesan; ókulu, face seels, luvas, máskara, roupa ne’ebé mak uza ba isin ka gaung no taka ba sepatu, bazeia ba planu ne’ebé mak servisu hamutuk ho Ministériu Saúde liu hosi Diresaun Nasionál Servisu Ospitalár no mós Diresaun Nasionál Farmásia no Medikamentu hodi difini kuantidade ne’ebé mak atu halo distribuisaun.
Tuir Diretór Ezekutivu SAMES, Santana Martins dehan katak “preparasaun ba distribuisaun ekipamentu no ohin loron, ekipa téknika hahú desloka tuir rejiaun hodi distribui hanesan, ba parte leste hahú hosi Manatutu, Baukau, Lospalus no Vikeke, no ekipa seluk ba Aileu, Ainaru, Manufahi no Kovalima, no ikus liu mak ekipa ida hosi Díli, Ermera, Likisa no Bobonaru, no mós inklui ho Rejiaun Administrativa Espesiál Oekusi-Ambeno”
Diretór Ezekutivu ne’e mós hatutan tan katak tuir tarjetu ne’ebé mak iha, ohin, tersa-feira hahú halo distribuisaun no sei remata iha iha kinta-feira. Servisu Autónumu Medikamentu no Ekipamentu Saúde ho Diresaun Nasionál rua hosi Ministériu Saúde halo balansu hodi distribui ekipamentu bazeia ba kálkulu Ministériu nian, kada Servisu Munisipál Saúde iha atus ida (100) maibé ba Ospitál no Sentru Izolamentu ita tau prioridade liu atus rua (200) no ita mós sei asegura nafatin kontinuidade ekipamentu. Tanba ita nia ekipamentu ne’ebé Estadu sosa iha hela prosesu, ho ida ne’e ita asegura no maneja ekipamentu ba kontinuidade hodi fasilita ita nia servisu pesoál saúde sira.
Comment