Sekretáriu Estadu ba Komunikasaun Sosiál, Merício Juvinal dos Reis “AKARA”, hato’o afirmasaun ne’e bainhira remata ona kampaña sensibilizasaun literasia dijitál iha ESTV “Halibur” Betano, hafoin hala’o vizita ba Grupu Feto Potensiál Sorumutuk-Sesurai “Betano”, hodi haree direita sira nia produtu hanesan “Soru Tais” no “Homan”.
Vizita ne’e hala’o iha sexta-feira, 07 fulan-Outubru, tinan-20222, iha Aldeia Sesurai, Suku-Betano, Munisípiu-Manufahi.
Merício Juvinal dos Reis “AKARA”, enkoraja grupu Feto Potensiál sira uza plataforma dijitál liu hosi meius komunikasaun hodi publika sira nia atividade, kreatividade nomós sosializasaun liu husi plataforma dijitál hanesan : Facebook, Instagram, Youtube nsst.
SEKOMS iha programa ida hanaran, Empoderamentu Grupu Feto Potensiál iha meius komunikasaun, tanba ne’e hakarak promove no kapasita sira iha formasaun hodi halo marketing/branding, publikasaun, atu nune’e sira bele fahe sira nia talentu no sai inspirasaun ba maluk feto sira seluk iha territóriu Timor-Leste, dehan “AKARA”.
“AKARA” mós husu ba Grupu “Sorumutuk-Sesurai” atu ajusta aan halo komunikasaun di’ak no prepara an, atu nune’e wainhira média sira entervista karik, sira bele brani koa’lia sai sira nia Atividade, kreatividade no Programa ne’ebé sira iha.
SEKOMS husu para grupu sira bele ajusta an hodi halo kombinasaun idea tradisionál no modernu ba Soru Tais no Homan, nune’e bele kompete iha merkadu nasionál no globál.
Governante ne’e husu ba Média Konvensionál no Média Dijitál sira, atu promove grupu empoderamentu feto potensiál sira iha munisípiu ne’ebé la hetan espasu ba média sira, hodi halo intervista ho sira hodi sai notísia lokál no nasionál labele foti notísia politíka ka notísia kona-ba Munisípiu-Dili de’it.
Ezekutivu ne’e sei koordena ho Sekretaria Igualdade no Inkluzaun-SEII, hodi bele fó espasu ba Grupu Feto Potensiál sira iha munisípiu, atu nafatin iha kapasidade ne’ebé iha hodi promove nafatin ba produtu no kreatividade ne’ebé iha liuhosi meius komunikasasun sosiál.
Entertantu Prezidente Konsellu Imprensa, Virgílio Guterres hateten katak, CI prontu kolabora no partisipa iha formasaun nomós oinsá atu uza média atu hato’o opiniaun sira
liuhosi meius komunikasaun.
Iha fatin hanesan Prezidente Autoriedade Munisípiu-Manufahi, Arante Isac Sarmento, agradese ba SEKOMS, bele promove di’ak liu tan produtu Grupu Sorumutuk-Sesurai sira iha Soru Tais Munisípiu-Manufahi ninian.
Entertantu Vizita SEKOMS nian ne’e atu hare direita kreatividade no talentu grupu “Sorumutu-Sesurai” liuhosi produsaun “Soru Tais no Homan” tradisionál hahú husi beiala sira to mai agora. Tanba Grupu refere iha tinan kotuk, sai ona parseiru ho SEKOMS liu hosi formasaun ne’ebé iha tinan kotuk, sai ona benefisiáriu.
Comment