Sekretáriu Estadu ba Komunikasaun Sosiál, Merício Juvinal dos Reis “AKARA”, husu ba rádiu komunidade 16 iha teritóriu nasionál atu adapta plataforma dijitál tanba mundu agora tama ona iha era dijitál no ho mudansa teknolojia halo ema barak komesa muda sira nia ábitu atu asesu ba informasaun liuhosi meiu dijitál.
Sekretáriu Estadu ba Komunikasaun Sosiál hato’o pedidu ne’e bainhira halo abertura ofisialmente ba Workshop Nasionál kona-ba Dijitalizasaun ne’ebé partisipa husi Konsellu no Jestor Rádiu Komunidade sira, segunda-feira, loron 23, fulan-agustu tinan 2021, iha Salaun Hotel JL Villa, Fatuhada, Dili.
Ezekutivu ne’e elojia inisiativa Diresaun Nasionál Promosaun no Dezenvolvimentu Mídia Lokál (DNPDML) ne’ebé organiza semináriu ne’e hodi hasa’e koñesimentu jestór Rádiu Komunidade sira nian kona-ba plataforma dijitál, maske nune’e rekoñese katak Rádiu Komunidade balun komesa utiliza ona plataforma streaming hodi divulga informasaun, maibé presiza aprende nafatin kona-ba utilizasaun plataforma dijitál hodi dezenvolve rádiu komunidade sira.
SEKOMS afirma Governu kontinua asegura apoiu ba Rádiu Komunidade sira, maske ho limitasaun orsamentu, maibé Governante ne’e hein katak iha futuru bele haree possibilidade hodi aumenta orsamentu ba Diresaun Nasionál Promosaun no Dezenvolvimentu Mídia Lokál hodi asegura funsionamentu servisu Rádiu Komunidade sira.
Líder másimu SEKOMS ne’e orienta dirijente sira iha DNPDML atu servisu makaas hodi dezenvolve mídia munisipál no programa Naroman ba Suku no husu mós ba Rádiu Komunidade sira atu promove kampaña kona-ba prevensaun Covid-19 no vasinasaun kontra Covid-19 liuhosi informasaun atu enkojara sidadaun sira hodi simu vasina nune’e bele atinji taxa vasinasaun 70% nu’udar meta hodi lori situasaun fila-fali ba normalidade.
Iha semináriu ne’e, SEKOMS asina akordu fundu transferénsia públika ho jestór Rádiu Komunidade 16 atu kontinua dezenvolve mídia estatál ne’e hodi fó satisfasaun ba públiku liuhosi informasaun.
Diretór Diresaun Nasionál Promosaun no Dezenvolvimentu Mídia Lokál-DNPDML, José da Costa, hateten akordu nee la’ós foin hala’o ba dahuluk, maibé estabelese dezde tinan 2015 liuhosi SEKOMS no atribuisaun fundu transferénsia públika ne’e hala’o dalarua kada tinan.
José da Costa realsa iha faze daruak ne’e, SEKOMS fó apoiu finanseiru kuaze millaun 75 ba estasaun Rádiu Komunidade sira no kada Rádiu Komunidade bele hetan entre rihun 3 resin to’o rihun 7 depende ba nesesidade ezekusaun.
Comment