Sekretáriu Estadu ba Komunikasaun Sosiál, Merício Juvinal dos Reis “AKARA”, husu ba Rádiu Komunidade sira atu serbí públiku ho responsabilidade liuhosi informasaun.
SEKOMS hato’o pedidu ne’e bainhira hala’o vizita traballu ba Rádiu Komunidade Maliana, sesta-feira, loron 11 fulan-marsu tinan 2022.
Ezekutivu ne’e hateten vizita ne’e ho objetivu atu haree diretamente funsionamentu serbisu iha mídia estatál ne’e no rona preokupasaun jestór no jornalista sira-nian, nune’e bele buka solusaun hodi serbí di’ak liután públiku iha futuru.
Governante ne’e husu ba jerente Rádiu Komunidade Maliana atu hakbesik an ba komunidade sira atu nune’e komunidade bele sente nain ba rádiu ne’e hodi partisipa ativa iha dezenvolvimentu meiu komunikasaun sosiál.
“AKARA” apresia serbisu jestór no jornalista Rádiu Komunidade Maliana no husu atu kontinua hala’o funsaun ho responsabilidade durante períodu kampaña eleitorál no eleisaun prezidensiál tinan ne’e.
Iha fatin hanesan, SEKOMS mós husu ba Diresaun Nasionál Promosaun no Dezenvolvimentu Mídia Lokál (DNPDML) atu kontinua akompaña serbisu jerente no jornalista RAKOM Maliana, liuliu programa sira ne’ebé transmiti liuhosi kanál mídia eletróniku ne’e.
Diretór DNPDML, José da Costa, afirma aumentu ba Fundu Tranferénsia Públika ba Rádiu Komunidade sira depende ba rezultadu ka progresu serbisu ne’ebé kada estasaun rádiu hatudu, liuliu programa sira ne’ebé fó sai ba públiku.
Tuir akordu estabelesidu, programa ne’ebé Rádiu Komunidade sira tenki transmiti mak hanesan programa Talk Show, Notísia, PSA, Drama no programa seluktán.
Dadaun ne’e, eziste Rádiu Komunidade hamutuk 17 iha teritóriu nasionál ne’ebé hetan apoiu Fundu Transferénsia Públika husi Governu liuhosi SEKOMS.
Comment