Sekretáriu Estadu ba Komunikasaun Sosiál, Merício Juvinal dos Reis “AKARA”, partisipa iha sesaun plenária, segunda-feira, loron 14 fulan-Marsu, tinan-2022, iha Uma Fukun Parlamentu Nasionál, Dili.
Antes tama ba períodu Ordem do Dia, Deputadu sira diskute kona-ba pedidu justifikasaun falta husi Deputadu Abílio Quintão Pinto, Duarte Nunes no Ricardo Baptista, Deputada Nelia Soares Menezes no Noemia Sequeira.
Hafoin justifikasaun falta, deputadu sira husi Komisaun D ne’ebé trata asuntu Ekonomia no Dezenvolvimentu halo aprezentasaun relatóriu kona-ba vizita fiskalizasaun iha munisípiu –Bobonaro, no tuir kedas ho deklarasaun polítika husi bankada parlamentár CNRT no KHUNTO.
Iha intervensaun diversas, Deputadu sira komenta relatóriu fiskalizasaun ne’ebé aprezenta husi Komisaun D no deklarasaun polítika sira inklui levanta kestaun sira liga ho problema edukasaun liuliu problema passaporte ne’ebé estudante sira iha Malayzia no Filipina hasoru inklui problema ekonomia ne’ebé liga ho subsídiu familiár-Sexta Bázika no kestaun seluk tan.
Hatan ba intervensaun Deputadu sira nian liga ho problema passaporte ne’ebé estudante sira hasoru, Sekretáriu Estadu ba Komunikasaun Sosiál, Merício Juvinal dos Reis “AKARA” hatete SEKOMS simu informasaun husi MESSC katak haruka ona karta ba Ministériu Justisa no Ministériu Negosiu Estranjeiru no Kooperasaun atu bele rezolve iha tempu badak.
Enquantu preokupasaun sira seluk ne’ebé seidauk fó resposta, SEKOMS sei enkamiña ba ministériu kompetente atu buka solusaun.
Comment