Díli, 14 Janeiru 2020, Projetu Instalasaun torre ne’ebé uza Sistema Dijitalizaun iha área Kutulau, Postu Administrativu Bazartete, Munisípiu Liquiça, atinji ona porsentu 80 no iha posibilidade sei finaliza iha fulan Fevereiru.
Sekretáriu Estadu ba Komunikasaun Sosiál, S.E Merício Juvinal dos Reis “AKARA” hateten iha finál fulan Fevereiru ka Marsu sei halo teste ba sistema dijitalizasaun ne’e hodi hare ninia kualidade antes entrega ofisialmente ba governu.
S.E SEKOMS apresia parseiru sira liuliu governu xina ne’ebé iha komprimisu atu apoia projetu instalasaun ba sistema ne’e.
Governu iha kompromisu atu kontinua fornese informasaun ba ninia sidadaun, tanba ne’e mak presiza dezenvolve meiu komunikasaun hirak ne’e atu bele fo informasaun ne’ebé kualidade.
S.E Merício Juvinal dos Reis “AKARA” haktuir Iha faze dahuluk, projetu instalasaun sistema dijitalizasaun ne’e sei benefisia populasaun iha Díli, Liquiça, Aileu inklui populasaun iha Kutulau-Bazartete, enquantu munisípiu seluk sei hetan asesu iha faze tuir mai.
Antes hari projetu Instalasaun sistema dijitalizaun ne’e, mosu dezentendimentu entre governu ho komunidade iha área Kutulau relasiona ho disputa rai, maibe SEKOMS ho apoiu husi Sekretaria Estadu Terras no Propriedade ikus mai bele hakotu disputa ne’e ho komunidade.
Vizita S.E SEKOMS terça-feira akompañadu husi S.E Terras no Propriedade, Embaxadór Xina iha Timor-Leste no komitiva.
Comment