Sekretáriu Estadu ba Komunikasaun Sosiál, Merício Juvinal dos Reis “AKARA” partisipa iha Komemorasaun Aniversáriu FALINTIL-FDTL nian ba dala-21, ho nia tema “Prontidaun no Profisionalizmu FALINTIL-FDTL mak hametin soberania no Integridade teritoriál”.

SEKOMS espera ho mudansa transformasaun jerasionál komandu F-FDTL sei lori susesu no garante estabilidade iha nasaun ne’e no mós husu ba foinsae sira atu proativu iha prosesu dezenvolvimentu nasaun nian.

Iha Serimónia aniversáriu transformasaun FALINTIL ba FALINTIL Forsa Defeza Timor-Leste ne’e, hala’o mós promosaun deviza ba Vise Xefe Estadu Maiór FALINTIL FDTL, Domingos Raul “Falur Rate Laek” ba kargu Xefe Estadu Maiór Jenerál F-FDTL, ho postu Tenente Jenerál, hodi substitui Tenente Jenerál reformadu, Tito Cristóvão da Costa “Lere Anan Timur”.

Hafoin hetan promosaun, Xefe Estadu Maiór Jenerál F-FDTL “Falur Rate Laek” simu kedas posse hosi Prezidente Repúblika (PR), Francisco Guterres “Lú Olo”, nu’udar Komandante Supremu ba Forsas Armadas Timor-Leste nian.