Governu liu husi Sekretáriu Estadu Komunikasaun Sosiál SEKOMS, Merício Juvinal dos Reis “AKARA” apela ba Rádiu Komunidade sira hala’o kna’ar ho Independente no profesionál durante eleisaun.
Merício Juvinal dos Reis “AKARA”, hato’o apelu ne’e durante vizita ba Radiu Komunidade “Vox Populi” hodi hare’e direita funsionamentu Rádiu Komunidade nian no progresu servisu sira no dezafiu sira, sexta-feira, loron 28 fulan-Janeiru, tinan-2022, iha edifísiu RAKOM “Vox Populi” Munisípiu-Lospalos
Ezekutivu ne’e apresia tanba Rádiu Komunidade Lospalos durante ne’e produz notisia barak, asegura kualidade no atualidade, respeita regra Jornalizmu no promove dezenvolvimentu setór oioin iha baze.
Governante ne’e hateten Governu nafatin fo ápoiu ba Rádiu Komunidade sira liuhosi transferénsia públiku hodi bele tulun jornalista sira hala’o kna’ar atu fó sai informasaun ba komunidade.
Iha fatin Diretór Nasional Promosaun Dezenvolvimentu no Media Lokál (DNPDML), Jose da Costa reforsa, SEKOMS ho diresaun nafatin ápoiu ba rádiu komunidade sira atu bele ajuda jornalista sira.
Durante vizita ne’e mós halo diskusaun ho Jestór, Produtor no Jornalista Rádio Komunidade Lospalos.
Enkuantu vizita ne’e akompaña husi Diretór Diresaun Nasionál Promosaun Dezenvolvimentu Mídia Lokál no Xefe Departamentu Apoiu Dezenvolvimentu Mídia Lokál no funsionáriu sira.
Comment