Sekretáriu Estadu ba Komunikasaun Sosiál, Mericío Juvinal dos Reis “AKARA”, akompaña husi Diretór Sentru Formasaun Teknolojia no Komunikasaun (CEFTEC-Sigla Português), Luiz Evaristo, Diretóra Nasionál Aprovizionamentu Lojistika, Angelina Maria Ximenes no Konsultóriu Lingua ba Jornalista
(CLJ), Claudia Taveira, halo supervizaun ba Sala formasaun ba Jornalista iha Balide, Dili, Sexta-feira, loron 07, fulan-maiu tinan 2021.
Mericío Juvinal dos Reis “AKARA”, hateten, apresia tebes esforsu no husu atu Diresaun rua ne’e kontinua observa no prenxe fasilidade ne’ebé maka sei falta.
“Bainhira Serka Sanitária no Konfinamentu Obrigatoriu ne’e remata bele utiliza fatin refere hodi hala’o atividade de formasaun”, Dehan SEKOMS.
Diretóra Nasionál Aprovizionamentu Lojistíka (DNAL), Angelina Maria Ximenes informa ba SEKOMS katak DNAL simu pedidu husi Diresaun CEFTEC no halo ona reabilitasaun ba sala rua hanesan sala ba tuir formasaun no sala ba formador sira. Fasilidade ne’ebé hetan reablitasaun maka hanesan manutensaun ba Ar Condisionado (AC), kanaliza be mos ba toilet, truka ahioan, plafon, odamatan no janela ne’ebé mak iha kondisaun at.
Diretór CEFTEC, Luis Evaristo mós akresenta, além apoiu reabilitasaun husi DNAL, hetan mós apoiu husi Sentru Formasaun Profesionál Tibar hodi fornese fasilidade hanesan kadeira no meza. Diretór ne’e mós informa katak atuálmente funsionáriu CEFTEC halo monitorizasaun regularmente dala tolu kada semana ba fatin refere.
Comment