Sekretáriu Estadu ba Komunikasaun Sosiál, Merício Juvinal dos Reis “AKARA”, aktualiza progresu servisu SEKOMS no Diresaun Nasionál Promosaun Dezenvolvimentu Media Lokál-DNPDML inklui Sentru Formasaun Teknika no Komunikasaun(CEFTEC-Sigla-Portugés), ba Primeru Ministru Taur Matan Ruak iha Rezidencia PM Farol Dili Terca Feira, 11,05 2021.
Merício Juvinal dos Reis “AKARA”, hateten iha enkontru ne’e atualiza progresu servisu SEKOMS liga ba moderniza ona rádiu komunidade husi sistema konvensionál ba rádiu streaming. Hamutuk iha rádiu komunidade sanulu resin rua maka publiku bele asesu ona liu husi rádiu streaming no iha mós Website proprio ba kada radiu nune’ e ema bele asesu inklui nasaun sira seluk bele akompaña.
“Aleinde ne’e ami atu dezenvolve media iha munisípiu, nune’e populasaun no autoridade sira labele depende ba media nasionál, depois COVID-19 ne’e remata, ami tun ona ba baze koa’lia ho Administrador sira hodi establese media iha munisípiu”, tenik “AKARA”.
To’o oras ne’e iha munisípiu tolu mak dadaun ne’e prontu ona hanesan, munisípiu Manufahi, Aileu no Lautem, ne’e Tuir planus SEKOMS sei apoiu infraestrutura iha tempu besik.
Entertantu “AKARA’’ afirma tan iha enkontru ho Primeiru Ministru ne’e, atualiza mós progresu servisu CEFTEC ne’ebé servisu mós hamutuk ho Instituto Camões-Embaixada Portugál, hodi dezenvolve hela formasaun Lian Portugés ba Jornalista sira.
“Ha’u orgullu, tuir formadór sira hatete mai ha’u, jornalista sira ne’ebé domina portugés ne’e nia kualidade diak 80%, falta 20% presiza tan halo revizaun uituan hodi hadi’ak liu tan lingua portugés”, dehan “AKARA”.
SEKOMS mos iha planu atu dezenvolve sentru formasaun bele sai institu profisional nune’e aban bain-rua bele hasai diploma I ka II hodi bele hasa’e kualidade jornalista sira hodi hetan sertifikadu. Ba planu ida ne SEKOMS sei kolabora ho konsellu Imprensa hodi Asegura kualidade jornalista sira.
SEKOMS halo ona konferensia internasional ba hari Institutu Formasaun Komunikasaun ne’ ebe produz ona ezbosu Planu Estratejiku no informa ona ba Ministeriu responsavel MAPKOMS atu halo preparasaun, dezenvolve kurikulu no rekezitu sira seluk.
“Infrestrutura provisorio hahú prepara ona iha Palásiu Governu no mós hahu rehabilitasaun sala ba Formasaun besik Edifisiu Konsellu Imprensa hodi fó formasaun lian ba jornalista sira”, dehan “AKARA”.
Aleinde iha ekontru ne’e mós Ezekutivu ne’e relata programa SEKOMS nian kona-ba Kampaña Nasionál hodi kombate HOAX no promove internet Saudavel.
“AKARA’’ afirma, atu kombate HOAX presija analiza oituan ba situasaun agora iha grupu balun ne’ebe promove hela dezinformasaun iha rai ida ne’e.
Governante ne’e realsa, SEKOMS hahú ona halo edukasaun sivíka, hodi halo kampaña nasional kombate HOAX no promove internet Saudavel, promove literasia dijitál nune’e bele prepara sidadaun hotu iha kapasidade hodi utiliza meius dijitál ba asesu Informasaun no labele konsumu HOAX.
Entretanto Xefe Governo, Taur Matan Ruak, apresia ho servico sira nebe’e maka SEKOMS hala’o ona duranti ne’e.
Comment