Laútem, 19/10/22. Total populasaun Timor Leste porvolta 1.3 juta ital, maibe agora dadaun utiliza internet por volta 1.4 juta ital, ho razaun, ema ida bele uza simcard rua to’o tolu. Lia hirak ne’e hato’o husi Sekretariu Estadu Komunikasaun Sosiál (SECOMS), Merício Juvinal dos Reis “AKARA” iha Kampaña Nasionál Kombate Hoax no Promove Internet Saúdavel, Liu husi Sensibilizasaun Literasia Dijitál, ba estudante Eskola Sekundária Jerál Numerú 1 Laútem, iha ESG-1, Postu Laútem , Munisípiu Laútem.
“AKARA”, mos salienta liu katak, iha era dijitalizasaun populasaun Timor Leste maiória uja telefone android, hodi asesu internet, hodi akompaña evulusaun sosiedade iha mundu ohin loron. Husi utilizador hirak ne’e maioria estudantes no juventude.
“ Iha Timor Leste populasaun ne’ebe uja internet 1.3 juta itál populasaun iha koneksaun ho internet kompara dadus via sosiál populasaun Timor 1.4 juta itál uja internet razaun sidadun balun uja sim card 2 too 3 no balun asesu tiha maibe la ativu”.
“AKARA” informa liu tan katak, espesifiku liu iha iha Timor Leste sidadaun sira uja internet ativu ho porsentu tolu nulu resin ida (31%)
Totál populasaun iha mundu liu husi via sosiál aktualisa katak populasaun 7.798, tuir dadus via sosiál iha loron 21, Julhu, 2022. Utilizador uja internet 77,9 % husi total 7.798 signifika 76 % uja internet.
SEKOMS hatutan, uja internet la’os nesesidade ba sidadaun sira maibé ne’e direitu sidadaun nian tanba ne’e, husu ba estudante sira no kada individu atu iha responsabilidade hodi promove setór potensiál no área Turizmu no setór produtividade sira seluk.
Antes remata Governante ne’e husu ba sidadaun sira sai transformador hodi tranforma dijitalizasaun no proteje sidadun sira atu apoiu liu tan programa Secoms nian ne’ebe foka liu ba koalia lia loos no mos kombate lia falsu (Hoax) nomos utiliza rede internet ho saudavel.
Tuir Deputadu Parlamentu Nasionál, Mariano Assanami Sabino ne’ebe sai mos orador iha Kampaña Nasionál Kombate Hoax no Promove Internet Saúdavel, Liu husi Sensibilizasaun Literasia Dijitál, katak jovem melinial mak joven ne’ebe kritiko no kreativo hodi aprende evolusaun mundo nian ne’ebe muda kada oras no loron.
Asanami ne’ebe sai orador no lori tema papel jovem melineal no oinsa atu uza plataforma digital ho saudavel hodi promove kreatividade katak uja internet ho responsabilidade hodi halo sivilizasaun hodi hatur valor umana no kontribui ba kontrusaun estadu demokratiku.
Asanami husu ba estudante sira atu uja internet ho responsabilidade ho objetivu komum atu hamosu kreatividade inovativu ho dijitalizasaun bele aprende no hatene hodi tau iha prátika ba Timor Leste.
Prezidenti Konsellu Imprensa (KI), Virgilio da Silva Guterres hatete internet hanesan biblioteka ba estudante sira atu uja hodi dezenvolve kapasidade no koñesimentu intelektuál hodi servi ba nia rain.
Prezidenti KI ne’e konsidera katak asesu ba internet ne’e diretu kada sidadaun no laiha limitasaun ba kualker ema ka sidadun ida iha era modernu.
Partispa iha ambitu kampaña ne’e maka hanesan, Sekretáriu Administradór Munisípiu Laútem, Administradór Postu Laútem, Komandante Polisia NasionalTimor Leste (PNTL) Eskuadra Munisípu Laútem, Diretór Eskola ESG Numerú 1 Lospalos, Professores no Estudante Sekundária ESG Numerú 1 Laútem, Funsionáriu SEKOMS.
Comment