𝐒𝐄𝐊𝐎𝐌𝐒 𝐎𝐑𝐆𝐔𝐋𝐋𝐔 𝐇𝐎 𝐌𝐄́𝐃𝐈𝐀 𝐒𝐀𝐏𝐍𝐄𝐖𝐒.𝐓𝐋, 𝐍𝐄’𝐄𝐁𝐄́ 𝐈𝐍𝐈𝐒𝐈𝐀 𝐇𝐔𝐒𝐈 𝐉𝐎𝐕𝐄𝐌 𝐒𝐈𝐑𝐀

Dili – 1/2/2023,Kuarta feira ne’e, Sekretáriu Estadu ba Komunikasaun Sosiál, Merício Juvinal dos Reis “AKARA”, hala’o vizita servisu ba edifísiu média SAPNewsTL, hodi hare direta kondisaun atuál media SAPNewsTL, iha Suku Becora, Postu Administrativu Cristo Rei Munisipiu Dili.

Merício Juvinal dos Reis “AKARA”, orgullu ho jovem sira ne’ebe halibur malu hodi harii media SAPNews TL, Inisiativa hanesan jovem estudante, ne’ebé iha komitmentu forte ho Espiritu voluntarismu ne’ebé makas bele halibur malu harii média ida ne’ebé mak ema hotu hatene katak atu harii média ida la fasil, maibé orgullu tanba sira bele konsege harii média ida.

“Husi inisiativa ida ne’e inspira ha’u katak, Timor-Leste iha komitmentu no Espiritu forte, dezenvolve nia rai, liuliu iha área komunikasaun sosiál, ha’u Apresia tanba bele ultrapassa difikuldade sira ne’ebé ha’u rasik hare laos fasil ne’e, maibé konsege hala’o atividade durante tinan ida ona”, dehan “AKARA”.

Lider jerasaun foun ne’e mos enkoraja jovem sira ne’ebé hamutuk iha média SAPNewsTL atu kontinua dezenvolve, nafatin servisu média no maske kria kondisaun simples, maibé sai tilun matan ba sidadaun sira, nomos kontente tanba bele harii edifísiu média iha foho leten, hodi asesu mós defisil, laos fasil, maibé jovem sira sempre badinas atu buka informasau hodi fahe ba sidadaun sira.

SEKOMS mós afirma katak husi vizita ida ne’e, atu Governu bele hatene kondisaun no kontinua kontribui liuliu iha área komunikasaun sosiál ninian.

Governante ne’e espera liu husi vizita ne’e, nafatin kontinua iha kolaborasaun hodi servisu hamutuk ho susesu liutan.

Ezekutivu ne’e mos salienta liutan katak, antes tama era dijitál, média kovensional sira eziste iha Timor, jovem estudante harii rasik média konvensionál sira hanesan jornal, ho rekursu ne’ebé limitadu maibé kontinua hodi divulga informasaun, agora tama iha era dijitál Timor oan sira aproveita tan harii média online ida ne’e hanesan Espiritu ida di’ak hodi dezenvolve rai ida ne’e no promove potensialidade Timor Leste nian ba mundu.

Governante ne’e esperansa ba média SAPNEWS.TL mak mantein Espiritu ne’ebé mak forte no iha komitmentu, hanesan rikosoin ne’ebé labele soe, no kontinua servisu tuir deit etika jornalista nian, servisu imparsiál, profisionál, sai matan, tilun, ibun ba sidadaun nia matan, hato’o informasaun loos no kredivel, ajuda sidadaun sira atu labele rona lia falsu.

Jovem mak airin nasaun nian presisa nafatin kapasita aan nune’e bele kompete iha futuru hodi lidera rai doben Timor Leste.

SEKOMS mós husu ba média sira iha eleisaun Parlamentar agora atu promove nafatin Peace Journalism, kontribui ba informasaun ne’ebé loos no kredivel liu husi edukasaun sivika, nomos kontribui pas no estabilidade, atu sidadaun sir abele hatene sira nia direitu hodi partisipa iha festa demokrasia ida ne’e.