DÍLI (MÍDIA SEKOMS) – Sekretáriu Estadu Komunikasaun Sosiál (SEKOMS), Expedito Loro Dias Ximenes, ensera diskusaun Meza-Redonda ne’ebé organiza hosi Asosiasaun Rádiu Komunidade Timor-Leste (ARKTL) iha ambitu Komemorasaun Loron Nasionál Liberdade Imprensa ba dala IV.
Atividade ne’ebé la’o iha Sentru Konvensaun Kaikoli, Díli, ho téma “Mekanismu Protesaun ba Jornalista iha Kontextu Eleisaun Prezidensiál 2027”. Diskusaun ne’e envolve oradór relevante sira hosi Polísia Nasionál Timor-Leste (PNTL), Provedoria Direitus Umanu no Justisa (PDHJ), Komisaun Nasionál Eleisaun (CNE) no Asosiasaun Jornalista sira.
Objetivu meza-redonda ne’e atu diskute oinsá proteje seguransa no liberdade jornalista sira nian durante kobertura iha tempu kampaña, eleisaun prezidensiál 2027 no eleisaun parlamentár. Diskusaun foka liu ba mekanismu legál, seguransa fízika no apoiu psikososiál atu nune’e jornalista sira bele halo kobertura ho livre, independente no seguru.
Iha enseramentu ne’e, Sekretáriu Estadu Komunikasaun Sosiál (SEKOMS) Expedito Loro Dias Ximenes, apela ba jornalista sira hotu katak, bainhira hakerek notísia presiza tuir regra no prinsípiu jornalízmu nian liu-liu imparsialidade no cover both sides (ruzumu hosi parte rua nian) atu labele kria duvida no prezuísu iha sosiedade ka fonte sira.
“Prinsípiu jornalízmu ida mak ‘cover both sides’. Dala barak ita haluha; sé ita husu informasaun ba António kona-ba João, ita tenke husu mós ba João atu konfirma lós ka lae. Se fonte rua ne’e ko’alia hotu iha notísia laran, ne’e hatudu katak ita halo ‘cover both sides’ no la kria dúvida ka estraga ema nia naran di’ak. Tanba ne’e, kolega sira keta haluha prinsípiu jerál jornalízmu nian ne’e,” apela Expedito.
Sekretáriu Estadu mós ho ksolok akresenta katak iha Lei Komunikasaun Sosiál nian fó dalan ba retifikasaun ka direitu ba resposta.
“Ha’u nafatin hateten iha fatin barak katak jornalista la’ós anju, mós la tun hosi lalehan katak sira nia servisu lós hotu. Karik iha kualkér erru ka sala, lei komunikasaun sosiál fó dalan no meiu liuhosi retifikasaun ka direitu ba resposta,” nia subliña.
Prinsípiu cover both sides ne’e engloba ekilíbriu, objetividade, direitu ba resposta no buka lia-lóss (verasidade) no faktu ho transparénsia ba públiku.
Diskusaun meza-redonda ne’e hetan partisipasaun másimu hosi jornalista sira hosi meiu komunikasaun sosiál, dirijente rádiu komunidade sira no Asosiasaun jornalista sira.
Comment