DÍLI (MÍDIA SECOMS) — Sekretáriu Estadu Komunikasaun Sosiál (SECOMS), Expedito Loro Dias Ximenes hamutuk ho Prezidente RTTL, E.P, Prezidente TATOLI, I.P. no ekipa hosi Konsellu de Imprensa (KI) marka audiénsia ho Komisaun G Parlamentu Nasionál ne’ebé trata asuntu Edukasaun, Juventude, Kultura no Sidadania, iha sala enkontru Komisaun G nian.
Iha diskusaun ne’e, Governu aprezenta rezultadu no progresu ezekusaun orsamentu tinan 2026, hamutuk ho planu estratéjiku ba Proposta Orsamentu Jerál Estadu (OJE) 2027 nian ba deputadu sira hosi Komisaun G.
Durante enkontru, Sekretáriu Estadu Komunikasaun Sosiál aprezenta ba deputadu sira katak, ba ezekusaun orsamentu SECOMS nian ne’ebé aloka USD $6,576,954.00 iha tinan 2026, ezekuta ona 64.3%. Ba proposta Orsamentu 2027 ho montante USD $5,627,784.00, nune’e Deputadu Sira mós hato’o hanoin uza oinsá halo servisu hodi fó atensaun ba média no jornalista sira, liuliu oinsá bele fó informasaun ho kualidade ba públiku.
Governante ne’e mós deklara katak sei nafatin fó atensaun iha Orsamentu Jerál Estadu 2027 nian ba subvensaun públika liuhosi transferénsia ba média privadu no plataforma dijitál sira ne’ebé serbisu hamutuk ho Governu.
Maski Governu fó apoiu liuhosi subvensaun públika, Governu sei la interven iha polítika editoriál no sala redasaun, maibé sei nafatin fó kapasitasaun no formasaun ba kolega jornalista sira hodi hasa’e kualidade informasaun ba públiku.
Iha diskusaun, deputadu sira preokupa liuliu ba bem-estar jornalista sira nian iha mídia ne’ebé sira servisu ba. Diskusaun ne’e esplika katak bem-estar presiza regula ho rejime espesiál ba jornalista sira ne’ebé serbisu iha mídia estatál, maibé ba média privadu sira, na’in ba empreza mak tenke fó atensaun ba bem-estar.
Sumáriu ezekusaun orsamentu tinan 2026 nian mak:
- Orsamentu totál: USD $6,576,954.00
- Kompromisu: USD $1,059,941.00
- Obrigasaun: USD $139,365.41
- Ezekusaun reál: USD $4,089,865.01
- Saldó: USD $1,287,782.58
Comment