DILI (MÍDIA SECOMS) — Sekretáriu Estadu ba Komunikasaun Sosiál (SECOMS) Expedito Loro Dias Ximenes, akompaña hosi Diretór Nasional Dezenvolvimentu Média (DNDM), Júlio Lopes selebra Kontratu subvensaun públika ho Prezidente Asosiasaun Jornalista hat.
Asosiasaun 4 ne’e mak hanesan Prezidente Uniaun Profesional Jornalista Timor Leste (UPJTL) Horacio Babo, Prezidente Timor Leste Press Uniaun (TLPU) Cândido Alves, Prezidente Asosiasaun Jornalista Timor Leste (AJTL) Zevonia Viera no Prezidente Asosiasaun Radiu Komunidade Timor Leste (ARKTL) Prezaldo Ximenes.
Kontratu ne’ebé selebra ho objetivu ba realizasaun atividade Média Tour hosi Asosiasaun sira nomos selebrasaun loron nasionál Liberdade Imprensa ba dala-4 ne’ebé sei hala’o iha tinan 2026.
Durante seremonia selebra kontratu, Sekretáriu Estadu Komunikasaun Sosial Expedito Loro Dias Ximenes apela ba prezidente Asosiasaun Jornalista hat ho estrutura tomak atu utiliza orsamentu tuir regra ka matadalan exekusaun orsamentu no submete relatóriu tuir tempu ne’ebé determina.
Orsamentu ba atividade Mídia tour no ba selebrasaun loron liberdade imprensa ba asosiasaun hat iha tinan 2026 ne’ebé atribui ba asosiasaun sira ho montante rihun rua nulu resin ida, atus hitu lima nulu dollares Amerikanu ( $ 21.750), no kada asosiasaun asesu dollares amerikanu rihun 5 resin, tuir proposta ne’ebé hato’o ba SECOMS.
Comment