Sekretáriu Estadu ba Komunikasaun Sosiál, Merício Juvinal dos Reis “AKARA”, partisipa segunda-feira loron 10 fulan-fevereiru tinan 2020 iha Reuniaun Plenária Parlamentu Nasionál.
Prezensa Sekretáriu Estadu ba Komunikasaun Sosiál iha plenária ne’e hodi rona preokupasaun husi Deputadu sira liu-liu kona-ba kestaun sira ne’ebé relasionadu ho ezisténsia husi vírus korona, bee mós, estrada, lixu iha sidade Díli no programa merenda eskolár hafoin halo fiskalizasaun iha terrenu.
Durante reuniaun plenária ne’e mós, Deputadu sira kestiona konaba rekrutamentu ba pesoál sira iha instituisaun Estadu no ezekusaun orsamentu duodésimu.
Relasiona ho preokupasaun husi Deputadu sira, Sekretáriu Estadu ba Komunikasaun Sosiál afirma sei aprezenta ba iha Konsellu Ministru hodi buka solusaun.
Iha biban ne’e mós, Bankada Parlamentár sira agradese ba apoiu husi governu Nova Zelândia ne’ebé halo esforsu hodi evakua estudante timor oan sira iha Wuhan-Xina.
Antes tama ba deklarasaun polítika husi Bankada Parlamentár sira no mós intervensaun husi Deputadu sira, Membru Parlamentu Nasionál hala’o uluk apresiasaun ba Relatóriu Fiskalizasaun husi Komisaun Finansa Públika (C) ne’ebé hala’o iha Munisípiu Baucau, Bobonaro no Ermera nomós votu kongratulasaun ba Deliberasaun UNESCO ne’ebé institui loron 5 fulan-maiu nu’udar loron Mundiál Língua Portuguesa.
Comment