Sekretáriu Estadu ba Komunikasaun Sosiál, Merício Juvinal dos Reis “AKARA” hateten, SEKOMS prontu atu fó apoiu ba Arkivu no Museu Rezisténsia Timorense-AMRT liuliu iha área rekursu umanu hodi halo produsaun ba filme dokumentáriu rezisténsia nian.
Merício Juvinal dos Reis “AKARA” hato’o assuntu ne’e hafoin hala’o sorumutuk ho Diretór AMRT, Hamar Antoninho Batista Alves no Prezidente RTTL.EP, Francisco da Silva Gari, kinta-feira, loron 20 fulan-fevereiru tinan 2020, iha sala enkontru SEKOMS, Palásiu Governu.
Sekretáriu Estadu ba Komunikasaun Sosiál afirma bainhira instalasaun ba sistema digitalizasaun konklui ona, RTTL sei oferese mós kanál ida ba AMRT hodi promove valor Luta Rezisténsia Povu Timor-Leste nian.
Entretantu, Diretór AMRT haktuir objetivu husi sorumutuk ida ne’e atu husu SEKOMS nia disponibilidade hodi fó apoiu tékniku ba AMRT atu halo publikasaun ba filme dokumentáriu kona-ba rezisténsia, tanba dadaun ne’e AMRT rasik la iha rekursu umanu ne’ebé sufisiente hodi halo produsaun ba dokumentáriu sira.
Liuhosi kanál digitál ne’ebé RTTL sei oferese ne’e, AMRT sei publika dokumentáriu sira ne’ebé relasiona ho mensajén antigu sira ne’ebé rekolla ona, entrevista ne’ebé hala’o ho responsável kaixa, responsável abrigu no guerilleiru sira atu nune’e povu bele hatene kona-bá sira nia istória ba luta libertasaun nasionál.
Comment