PRIMEIRU-MINISTRU TAUR MATAN RUAK KRIA KOMISAUN AKOMPAÑAMENTU NO AVALIASAUN ESTRATÉJIA BA PREVENSAUN NO KOMBATE COVID-19

Dili, 23 Marsu 2020: S.Exa. Primeiru-Ministru Taur Matan Ruak, kria ona Komisaun Akompañamentu no Avaliasaun Estratéjia ba Prevensaun no Kombate pandemia Koronavírus ka COVID-19 liu hosi Diploma Ministerial 001/PM/III/2020/ 20 Marsu 2020/, Ekipa ne’e mai hosi profissional saúde experiente sira, ho objetivu atu ajuda Xefe Governu iha foti desizaun b aluta kontra COVID-19.

Ekipa ne’e sei fornese akonsellamentu téknika no estratéjiku ba Xefe Governu kona-ba medidas protidaun no resposta ba prevensaun no kombate Pandemia COVID-19.
Ekipa ne’e kompostu hosi ;
1. Dr. Sérgio Lobo, Antigu Ministru Saúde iha V Governu Konstitusionál.

2. Prof. Dr. Nelson Martins, Antigu Ministru Saúde iha IV Governu Konstitusionál.

3. Dra. Ana Isabel de Fátima Sousa, Antigu Vise Ministra Saúde iha VI Governu Konstitusionál.

4. Dr. Rajesh Pandav, Reprezentante Organizasaun Mundial ba Saude (OMS) iha Timor-Leste.

5. Dra. Cristina Lima, Antiga Ministra Saúde Cabo-verde no agora hanesan Asesóra iha Ministériu Reforma Lejizlativa no Asuntu Parlamentar no

6. Dra. Danina Coelho, Espesialista timoroan iha Moras Infektu-Kontasioja hosi, Klínika Internasionál Stanford.

Ekipa ne’e ohin lokraik hala’o sorumutu dahuluk ho Xefe Ezekutivu hodi akonsella Primeiru-Ministru teknikamente no estratéjikamente oinsá atu luta kontra pandemia COVID-19, nune’e Xefe Governu iha informasaun detalladu hodi fasilita foti desizaun rápida.

Governu mos antes ne’e kria ona Ekipa Interministerial ne’ebé daudaun ne’e Ministra Saúde Interna mak lidera ba Prevensaun COVID-19, hodi bele proativu liután halo prevensaun ba COVID-19., maibe Xefe Governu snete ne’e seidauk to’o tanba ne’e presija espesialista saúde atu bele reforsa liután serbisu Governu nian iha luta kontra Pandemia ne’e.

HAMUTUK ITA KOMBATE COVID-19