DILI (MÍDIA SECOMS) — Governu Repúblika Demokrátika Timor-Leste hato’o nia sentidu kondolénsia ne’ebé kle’an ba Padre João Vasconcelos Baptista Felgueiras, S.J., nia mate ne’ebé akontese ohin, iha loron 3 fulan-jullu, iha Dili, ho idade 105.
Padre João Felgueiras moris iha Caldas das Taipas, Guimarães, Portugál, iha loron 9 fulan-juñu tinan 1921, nia to’o iha Timor-Leste iha tinan 1971 hodi hala’o knaar nu’udar vise-reitór Semináriu Dioseze Dili nian. Misionáriu jezuita ida, nia dedika nia an liu sékulu metade hosi nia moris hodi serbí povu timoroan. Padre João nu’udar profesór lian portugés, edukadór, no misionáriu, nia kontribui ba formasaun jerasaun povu timoroan tuituir malu no mós prezerva no promove lian portugés, maski iha tinan hirak ne’ebé uzu lian ne’e bandu durante okupasaun indonézia.
Hafoin invazaun indonézia iha tinan 1975, nia deside atu hela nafatin iha Timór-Leste, hodi akompaña povu timoroan durante períodu ida ne’ebé susar liu iha sira-nia istória maski iha risku pesoál no rekomendasaun sira atu sai hosi territóriu ne’e. Ninia misaun pastorál, edukativa no umanitária nu’udar kontribuisaun importante ida ba prezervasaun identidade nasionál, no mós ba promosaun solidariedade, dignidade umana no esperansa.
Ninia dedikasaun ba edukasaun no dezenvolvimentu umanu mós hatudu iha kriasaun no dinamizasaun inisiativa sira ho impaktu sosiál boot, liuliu liuhosi FACSI – Fundo de Ajuda Caritativa Social da Companhia de Jesus – Comunidade Amigos de Jesus, ne’ebé permite fó bolsa estudu ba joven timoroan atus ba atus, ne’ebé barak tuirmai asume responsabilidade importante iha Estadu no sosiedade. Ninia legadu mós nafatin moris iha instituisaun sira hanesan Centro Juvenil Padre António Vieira no Escola Amigos de Jesus, ne’ebé fó sasin kona-ba ninia kompromisu permanente ba formasaun jerasaun foun sira.
Hodi rekoñese servisu importante sira ne’ebé nia fó ona ba Timor-Leste no ba nia povu, nia hetan kondekorasaun hosi Estadu Timór ho Insígnia Orden Timor-Leste iha tinan 2009, no ho Kolar Orden Timor-Leste iha tinan 2022, ne’ebé nu’udar kondekorasaun nasionál aas liu. Iha tinan 2011 Padre João simu mós nasionalidade timoroan, nu’udar rekoñesimentu ba ninia servisu ne’ebé boot no importante tebetebes ba nasaun ne’e. Portugál mós rekoñese ninia dedikasaun hodi fó ba nia grau Grande-Oficial da Ordem da Liberdade iha tinan 2002, no ho Grã-Cruz da Ordem de Camões iha tinan 2022. Iha tinan 2024, durante Papa Francisco ninia Vizita Apostólika ba Timor-Leste, fó omenajen pesoál ida ba nia, hodi rekoñese ninia misaun naruk iha servisu ba povu timoroan.
Padre João Felgueiras nia legadu sei liga ba nafatin ho istória Timor-Leste nian. Ninia moris ne’ebé nakonu ho servisu, korajen, solidariedade, no dedikasaun nu’udar ezemplu kompromisu ida ba edukasaun, justisa, dignidade umana no dezenvolvimentu nasionál, ne’ebé sei hanoin ba nafatin no agradese hosi povu timoroan.
Ministru Prezidénsia Konsellu Ministrus no Portavós Governu nian, Agio Pereira, hateten katak “iha momentu lutu ida-ne’e, Governu hato’o sentidu kondolénsia ne’ebé kle’an ba Companhia de Jesus, Igreja Katólika, ninia família, belun sira, antigu alunu sira, no mós povu timoroan tomak. Ita hotu hamutuk ho sira ne’ebé sente triste tanba nia mate, no ita fó omenajen ba memória ema ne’ebé halo Timor-Leste sai nia nu’udar rai-doben, tantu nu’udar misaun no mós nu’udar destinu ne’ebé nakonu ho fuan”. REMATA
Comment