DILI (MÍDIA SECOMS) — Repúblika Demokrátika Timor-Leste no Estadus Federadus Mikronézia estabelese formalmente relasaun diplomátika ho asinatura Komunikadu Konjuntu ida ne’ebé hala’o iha loron 24 fulan-Juñu tinan 2026, iha Embaixada Timor-Leste iha Kamberra, Austrália. Serimónia ne’e marka inísiu ofisiál ba relasaun bilaterál entre Estadu soberanu rua ne’e.
Komunikadu Konjuntu ne’e asina hosi Embaixadora Timor-Leste ba Austrália, Inês Maria de Almeida, no Embaixadora Estadus Federadus Mikronézia nian ba Austrália, Jane J. Chigiyal. Asinatura ne’e asiste husi Ministru Negósius Estranjeirus no Kooperasaun, Bendito dos Santos Freitas, nu’udar parte husi nia vizita ofisiál ba Austrália.
Durante serimónia, Embaixadora Jane J. Chigiyal destaka valór sira ne’ebé nasaun rua ne’e iha no kooperasaun ne’ebé eziste ona iha forum multilaterál oioin, maka hanesan iha Nasoins Unidas, Aliansa Estadu Illa Ki’ik sira (AOSIS), Grupu 77 (G77), Grupu Estadus Áfrika, Karaíbas no Pasífiku (ACP), no mós iha Forum Illa Pasífiku sira. Nia mós dehan katak estabelesimentu relasaun diplomátika ne’e aumenta dimensaun bilaterál ida ba kolaborasaun ida-ne’e no hato’o nia konfiansa iha hametin kooperasaun entre nasaun rua ne’e.
Embaixadora Inês Maria de Almeida salienta katak asinatura Komunikadu Konjuntu ne’e marka inísiu ba kapítulu foun amizade, solidariedade, no parseria entre Timor-Leste no Estadus Federadus Mikronézia. Nia mós destaka kompromisu komún hosi nasaun rua ne’e ba defeza soberania, promosaun dezenvolvimentu sustentável, reforsu iha asaun klimátika, protesaun ekosistema tasi nian, no defende interese hosi Estadu Illa Ki’ik sira ne’ebé iha hela Dezenvolvimentu.
Parte rua ne’e reafirma sira-nia intensaun atu aprofunda kooperasaun iha área sira ne’ebé sai interese hamutuk, ne’ebé inklui reziliénsia klimátika, governasaun oseanu, dezenvolvimentu ekonómiku sustentável, interkámbiu kulturál no entre povu sira, nune’e mós kooperasaun entre nasaun illa sira hosi Pasífiku no Sudeste Aziátiku.
Estabelesimentu relasaun diplomátika ne’e kria kuadru foun ida ba dezenvolvimentu diálogu polítiku no kooperasaun bilaterál entre Timor-Leste no Estadus Federadus Mikronézia, hodi hametin lasu amizade entre nasaun rua ne’e.
Comment