Sekretáriu Estadu ba Komunikasaun Sosiál, Merício Juvinal dos Reis “AKARA” akompañadu husi Sekretária Estadu Igualdade no Inkluzaun, Maria do Rosário Fátima Correia, Prezidente TIC Timor, Roberto Sousa Caetano no Prezidente Konsellu Imprensa, Virgílio Guterres, lansa ofisialmente Portál “goodnewsontl.gov.tl”, kuarta feira, loron 27 fulan-abril tinan 2022, iha resintu Palásiu Governu, Dili.
Merício Juvinal dos Reis “AKARA” konsidera kriasaun plataforma ne’e importante tebes iha era dijitál hodi divulga informasaun pozitiva sira kona-ba poténsia sira ne’ebé eziste iha Timor-Leste ba sosiedade, nune’e bele adapta an ho dinámiku ne’ebé lao iha mundu.
Ezekutivu ne’e afirma kriasaun portál “good news” ne’e mós nu’udar meiu ida hodi kontribui ba kombate informasaun falsa sira ka HOAX ne’ebé espalla iha ita-nia rai-laran no ajuda diplomasia externa nune’e ema iha nasaun seluk bele hatene kona-ba notísia di’ak sira kona-ba Timor-Leste iha setór oioin inklui kriatividade joven sira-nian, setór turístiku no seluktán ne’ebé bele hasa’e imajen Timor-Leste nian iha mundu.
SEKOMS mós apresia serbisu ekipa SEKOMS no TIC Timor ne’ebé dezenvolve ona plataforma dijitál ne’e no husu nafatin apoiu TIC Timor nian iha jestaun ba website ne’e.
Website “goodnewsontl.gov.tl” ne’e kria husi TIC Timor ho kooperasaun ho SEKOMS, ho nia domain name “goodnewsontl.gov.tl”. Informasaun ka notísia sira ne’ebé sei lansa iha portál ne’e ho lian tolu hanesan Tetun, Portugés no Inglés.
Atu garante funsionamentu website ne’e, SEKOMS sei koopera ho pesoál komunikasaun ka média officer sira husi instituisaun estadu sira inklui instituisaun autónoma sira hodi fornese informasaun pozitiva sira kona-ba atividade Ministériu ka Sekretaria Estadu nian ba iha portál ne’e.
Serimónia lansamentu ne’e partisipa husi Prezidente IGE.IP, Prezidente TATOLI.IP, Prezidente EDTL.EP, Country Director husi Embaixada Austrália, Xefe Gabinete, okupante kargu diretór no xefia sira husi liña ministériál sira, formadór sira husi Konsultóriu Língua ba Jornalista, Média Officer sira, funsionáriu no jornalista sira.
Comment