Sekretáriu Estadu ba Komunikasaun Sosiál, Merício Juvinal dos Reis “AKARA”, hato’o apresiasaun ba estudante nain walu ne’ebé ho inisiativa ho uza matenek rasik konsege produz livru, “Filosofia Política e Ética: Platão a Axel Honneth, uma crítica sociál”, ne’ebé tuir perspetiva haree importante ba iha nia diskusaun nivel akademiku iha rai ida ne’e.
Merício Juvinal dos Reis “AKARA”, hato’o apresiasaun ne’e ba hakerek nain husi Estudante Finalista Filosofia nain 8, Ano Letivo 2021 no partispante sira, kuarta-feira, loron 07, fulan-Setembru, tinan-2022, iha salaun ISFIT, Fatumeta, Dili.
Governu sei konsidera ho inisiativa sira hanesan ne’e, liuliu Governu liu husi Ministériu Edukasaun nafatin simu hodi hariku nafatin referénsia literatura iha rai ida ne’e tanba, Estudante sira konsege hakerek livru filosofia uza perspetiva matenek nain “Plato”, hodi haree klena kona-ba asuntu sosiál, dezenvolvimentu polítika iha rai ida ne’e.
“Orgulho tanba entre Timor oan sira hotu, ita boot sira hahú apreende filosofia, tanba hanesan ita hatene katak filosofia ne’e hanorin ita atu hatene klean assunto sira, nune’e ema mak apreende filosofia sempre mai ho hanoin krítiku no kestiona problema hotu nia abut” dehan “AKARA”
Ezekutivu ne’e esklarese tan katak, sei transmite ba informasaun sira ne’e ba membru Governu ne’ebé iha ligasaun direta ba iha siénsia no kultura atu konsidera livru sira ne’e.
Governante ne’e husu atu estudante sira atu badinas lee livru tanba husi livru ne’e koa’lia kona-ba virtude iha justisa hodi dezenvolve no distribui justisa ba ema hotu no fó ba ema ne’ebé mak nain ba justisa iha rai ida ne’e.
“Iha livru ne’e ko’alia mós kona-ba sabedória, ita presiza iha koñesimentu hodi ukun ita nia aan, ita nia sosiedade no ita nia nasaun”
Livru ne’e mós enkoraja, atu iha korajem morál hodi servi ho dignidade, hodi ukun no dezenvolve rai ida ne’e no kumpri konstituisaun, dehan “AKARA”.
“AKARA”, Elojia ba estudante hakerek nain ba livru ne’e no merese tanba kontribui ba dialekti ideias nomós promove disukursu entre sidadaun.
SEKOMS enkoraja estudante husi primáriu no sekundáriu sira atu aprende nafatin filosofia tanba iha hanoin ne’ebé kritiku no klean no solusaun ne’ebé klean.
Governante ne’e sei koordena ho membru Governu ne’ebé tutela, se bele livru ne’e hanorin ba eskola sira, nomós biblioteka nasionál ne’ebé fulan kotuk, S.E, Primeiru Ministru lansa ona, biblioteka sai fatin ba livru sira hanesan ne’e, tanba livru mak fatin hodi sai nutrisaun ka vitamina pozitivu ba kakutak no pensamentu.
“AKARA” mós husu ba Estrutura ISFIT sira atu transforma livru sira ne’e ba iha dijitál nune’e bele lansa iha smartphone sira nune’e jovem no estudante sira bele lee liu husi smartphone.
Iha fatin hanesan, Pe. Justino Tanec iha nia intervensaun agradece tebes ba karakter familiaridade nebé hatudu husi SEKOMS, hodi disponibiliza nia tempu atu bele marka prezensa no hala’o lansamentu ba livro refere.
Livru ne’e, hakerek husi estudante hirak hanesan: Noé Xacala Taveres, João Gilberto Oqui, David Martins, Nério R. S. Freitas, Ezaquiel dos Reis, Aderito Ferreira, Octávio Marques, Zebedeu Mota de Araújo; editor sira maka hanesan: Professor Elídio Agusto Guterres, Pe. António Q. Do C. Do Balino no Pe. Domingos Xavier.
Entretantu serimónia refere hetan partisipasaun máximu husi Dekanu ISFIT,docentes,estudantes husi fakuldade filosofia e teologia, Tékniku Espesializadu SEKOMS no jornalista sira.
Comment