Ermera, (22/102022), Média mak lori prosesu luta ba ukun rasik a’an ba mundu nia matan no tilun, hodi hetan simpatia no apoiu makas liu tan hosi komunidade internasionál. Lia hirak ne’e hato’o hosi Sekretáriu Estadu ba Komunikasaun Sosiál(SEKOMS), Merício Juvinal dos Reis “AKARA”, wainhira sai oradór ba iha ba iha Semináriu Nasionál iha Ambitu komemorasaun Loron Nasionál Juventude Loriku Asw’in ba 12 Novembru 2022, ho tema “Kna’ar Média nian iha tempu rezisténsia no tempu agora”, iha Suku-Fatu-Besi, Administartivu Hatulia-B, Munisípiu-Ermera, Sabadu ne’e.
Média mak pilar importante hodi divulga informasaun kona-ba prosesu luta ba ukun rasik a’an, no sai matan tilun hodi fó sai ba mundu katak, prosesu luta ba ukun rasik a’an iha Timor-Leste nia fundamentál mak Gerilheiro Falintil.
“Média nia papel, iha prosesu ukun rasik a’an, maka hala’o kna’ar importante hodi divulga informasaun husi Gerilheiro sira hotu nune’e hato’o ba mundu internasionál hodi hetan simpatia no apoiu nune’e bele akompaña prosesu luta ba ukun rasik a’an iha Timor-Leste” Ezemplu: Jornalista estranjeiru nain lima ne’ebé mate iha invazaun Indonésia mai Timor-Leste iha Balibo, Munisípiu Bobonaro, Jornalista Max Sthal nomós jornalista sira seluk ne’ebé labele temi naran ida ida” tenik “AKARA”
Iha tempu Independénsia média nia papel importante mak halo dame, sai edukadór, inspiradór nune’e bele lori hakmatek ba povu hodi partisipa ba dezenvolvimentu Timor-Leste. Média mós sai autór ba libertasaun povu. VIII Governu Konstituisionál firmi nafatin atu fo matan no dalan ba jornalista hotu nune’e labele halo notísia ne’ebé laiha benefísiu ba povu no nasaun Timor-Leste. Tanba papel jornalista nu’udar ajente prinsipál ba povu no nasaun.
Fundamentál Ukun Rasik a’an mak Gerilheiro Falintili sira hotu, no habelar husi média, diplomasia no ajentes prinsipál sira hotu ne’ebé hola papel importante prosesu ukun rasik a’an nomós prosesu luta ba moris di’ak povu no rai doben Timor-Leste.
Uluk matenek halo kilat lori ba funu maibé agora tenki matenek iha erá dijitál, se deit mak mak uza telephone matenek(smartphone) hodi asesu internet iha plataforma dijitál maka nia mós hetan informasaun no matenek hanesan ho rai seluk, laiha diferente maske Timor-Leste nasaun kiik, kiik iha fiziku maibé matenek iha kakutak, tenik “AKARA”.
Entertantu Semináriu Nasionál ne’e organiza husi Sekretaria Arte no Kultura(SEAK), ne’ebé ofisiálmente lansa hosi Ministru Asuntus Kombatentes ba Libertasaun Nasionál(MCLN-Sigla Portugés), no partisipa hosi Visé Ministru Saúde, Visé Ministru Agrikultura, Reitór UNTL, konvidadus sira seluk no komunikade suku Fatu-Besi
Comment