𝐒𝐄𝐊𝐎𝐌𝐒 𝐀𝐏𝐑𝐄𝐒𝐈𝐀 𝐄𝐙𝐈𝐒𝐓𝐄𝐍𝐒𝐈𝐀 𝐌𝐄́𝐃𝐈𝐀 𝐒𝐀𝐏 𝐍𝐄𝐖𝐒 𝐓𝐋.

Dili, 24-02-2023, Sekretáriu Estadu ba Komunikasaun Sosiál, Merício Juvinal dos Reis “AKARA”, hato’o apresiasaun ne’e, bainhira hato’o diskursu iha serimónia selebrasaun aniversáriu dahuluk Média Sa’ani Assamana Prazer News Timor-Leste ( SAP NEWS TL ), Sexta Feira ne’e  iha salaun INAP, Comoro, Dili.

Merício Juvinal dos Reis “AKARA”, hato’o apresiasaun no  parabéns ba Média SAP NEWS TL, ne’ebé ho kondisaun ne’ebé laos fasil maibé iha  vontade no komitmentu hala’o servisu média nian durante tinan ida nian.

Reprezenta VIII Governu Konstituisionál, hakarak hatudu Governu apresia no sei akompaña dezenvolvimentu média iha rai ida ne’e.

“Ha’u apresia Média SAP NEWS TL, tama iha plataforma dijitál, tanba erá agora primadona, média hotu-hotu sei atualiza an. Ha’u husu ita bo’ot sira atu mantein iha plataforma dijitál no atualiza aan nomós dezenvolve, hasa’e nafatin kualidade laos iha Timor-Leste deit, maibé rai liur sira mós bele assesu informasaun ne’ebé ita bo’ot sira públika, bele mós ho lingua Portugés, English no Indonésia”, hateten “AKARA”.

Hanesan Governu hakarak fahe sentimentu ne’ebé Governu sente, bainhira renking Indeks Globál iha tinan-2022, Timor-Leste nia pozisaun di’ak husi valor  71 tun ba  17, Timor-Leste manan nasaun barak iha ASEAN no Timor-Leste nia liberdade imprensa no liberdade espresaun.

Ezekutivu ne’e salienta katak, iha tinan ida ne’e tinan politika ba festa demokrasia nian ne’e duni husu média, atu kontribui ba  pas, peace journalism, divulga informasaun loos no kredivel ba públiku.

Média presiza  kaer prinsipiu rasik iha development journalism, nomós ba iha dezenvolvimentu nasaun nian, liuliu dezenvolve karakter sidadaun nian,  para sidadaun bele iha karakter diak,  média sira sai ajente ba karakter building Timor oan nian, oinsá dezenvolve rai ida ne’e ho vizaun ne’ebé mak serteza no sai filtru ne’ebé mak di’ak, hateten “AKARA”.

Governante ne’e mos realsa  tan katak, Média SAP NEWS TL, atu bele sai pioner no servisu makas, badinas no pasensia nune’e susesu nafatin iha futuru.

Entertantu Prezidente Média SAP News TL,  agradese ba SEKOMS ne’ebé disponivel partisipa iha lansamentu no selebra aniversáriu ba dahuluk nian.

Prezidente SAP NEWS TL Clementino Machado hateten ho aniversáriu no lansamentu média nian ne’e, ba oin estrutura no jornalista sira sei servisu ho profisionál bazeia ba kode etika jornalista, liuhosi liberdade imprensa no liberdade espresaun.

Entertantu Serimónia ne’e partisipa husi reprezentante Conselho Imprensa,Sr. Espedito Dias Ximenes, Conselheiro Média SAP News TL, ho konvidadus sira seluk.