DILI (SECOMS) — Relasiona ho informasaun/notísia hosi mídia online Hatutan.com, ho títulu notïsia kona-ba, SEKOMS Expedito Ximenes “Admite” Elizeu Isaac Viola Lei Hodi Hala’o Mós Knaar Nu’udár Primeiru Vise-Sekretáriu Ezekutivu OJP-CNRT Munisípiu Díli, ne’ebé publika iha loron tersa-feira, loron 13 fulan-Janeiru tinan 2026. SECOMS hanoin katak iha diskrepánsia entre títulu no substánsia deklarasaun nian. Títulu ne’ebé publika la reflete kompletamente kontestu entrevista no iha potensiál atu hamosu interpretasaun la loos iha públiku.
Tanba ne’e, Secretário de Estado da Comunicação Social fó sai hela klarifikasaun ofisiál ne’e nu’udar forma responsabilidade institusionál hodi hadi’a informasaun no reafirma prinsípiu ezatidaun no objetividade iha informasaun.
Secretário de Estado da Comunicação Social (SECOMS) Expedito Loro Dias Ximenes, fó sai hela klarifikasaun ofisiál ida kona-ba informasaun hosi mídia online Hatutan.com, konsidera la reprezenta loloos substánsia hosi deklarasaun durante entrevista. Notísia nia títulu ne’ebé publika la aliña ho narrativa, no reflete ba jornalista nia opiniaun, katak, la’ós SECOMS nia deklarasaun ofisiál.
Entrevista entre Hatutan.com ho Secretário de Estado da Comunicação Social Expedito Loro Dias Ximenes ne’e akontese iha loron tersa-feira, loron 13 fulan-Janeiru tinan 2026, iha Salaun Enkontru Konsellu Imprensa Timor Leste, Kintal Boot, hafoin enkontru entre governante ne’e ho Xefe Redasaun, Diretor Mídia, no lideransa Asosiasaun Jornalista sira nian.
Depois sorumutu, Jornalista sira hosi Plataforma oioin halo entrevista fila-fali kona-ba rejultadu enkontru ne’e, Jornalista Hatutan.com lansa perguntas, no SECOMS hato’o nia hanoin sira bazeia ba enkuadramentu legál no regulamentu ne’ebé aplikavel.
Iha alínea 7 hosi konteudu notísia ne’e, Secretário de Estado da Comunicação Social (SECOMS) Expedito Loro Dias Ximenes esplika katak, “Iha nia kurikulum ne’e mai husi partidu A ka B ne’e laiha tanba estatutu RTTL ne’e, hateten klaru. lideransa bá RTTL, E.P ne’e la bele mai husi partidu, sé Elizeu líder partidu ne’e lei la fó dalan,” Expedito Dias Ximenes afirma. Deklarasaun ida-ne’e aprezenta hanesan interpretasaun normativa ida ba provizaun legál, lahó refere ba, julga, ka afirma indivídu espesífiku ruma.
Atu justifika substánsia husi deklarasaun ida-ne’e, Secretaria de Estado da Comunicação Social hasai deklarasaun klarifikasaun tuir mai:
“Há’u hakarak fo ba iha públiku liuliu ba sira ne’ebé akompaña media sosial kona-ba notísia hatutan.com ne’ebé ho títulu SEKOMS admite Eliseu Isaack viola lei hodi halo mós kna’ar nu’udar primeiru Vise-Sekretáriu Ezekutivu OJP CNRT Munsipiu Dili, tantu títulu husi notisia online ida ne’e la tuir deklarasaun ne’ebé hatutan rasik husu ba ha’u iha enkontru horseik iha Konselhu Imprensa tantu iha pergunta duni kona-ba Prezidenti RTTL hetan tomada de posse sai primeiru sekretariu OJP, maibe ha’u hateten, bainhira Konsellu Ministru nomeia Elizeu Isaac Fernandes iha Fevereiru tinan 2025, ne’e señor Eliseu la’ós dirijente partidu, maibé sé nia agora sai Prezidente partidu ha’u seidauk hatene ha’u seidauk rona ne’ebé ami sei buka verifika kona-ba informasaun ida ne’e”.
“Husu ba publiku ne’ebé asesu iha media sosial liuliu ba asesu ba notisia hatutan nian, klaru mak ida ne’e katak, tuir dekretu lei 42 /2008 ne’ebé transforma RTTL,E.P ba empreza publika iha artigu 13 husi dekretu ne’e klaru tebes katak, labele sai membru Konsellu Administrasaun sa tan Prezidente, ema ida ne’ebé funsionariu no ajente administrasaun publika, i ida fali labele sai dirijente ba partidu politiku sira, ne’ebé husi artigu 13 dekretu lei 42 2008 ne’e hatudu momos katak, baihira Prezidente ba media Estatal maka hola parte iha hanesan dirijente ba partidu politiku ne’e bolu inkompativel katak labele hala’o kna’ar dirijente ba media ida, tanba ne’e hanesan ezemplu, iha momentu ha’u nia kolega Antonio Belo iha momentu nia mos Prezidente Konsellu Administrasaun RTTL, mesmu nia hanesan militante no simpatizante partidu, ne’e ida idak nia direitu politika sidadaun ida iha, maibé nia sai dirijente ne’e kona kedan iha artigu 13 dekretu lei ida ne’e, ne’e inkompativel laiha ona inkompatibilidade,”.
“Atu husu mós ba públiku katak, ami agora verifika hela kona-ba verasidade kona-ba informasaun ne’ebé fo sai iha media sosial katak, Prezidente RTTL Sr. Elizeu Isack Fernandes asumi kargu mós hanesan Vise Primeiru Ezekutiuivu iha OJP Munisipiu Dili nian, nune’e ami sei verifika hela, maibé saida mak Hatutan fó sai, la tuir saida mak ha’u ko’alia, ne’ebé ha’u husu ba públiku atu nafatin akompaña informasaun ne’ebé kredivel, informasaun ne’ebé tuir lolos tenke iha verasidade, tuir deklarasaun fonte ne’ebé ko’alia, ho ida ne’e ami sei kontaktu ba media hatutan.com atu bele hadi’a fali informasaun ne’ebé lalos, se karik ami verifika mak los dunik maka fo sai husi sosial media katak, Prezidente RTTL,E.P asumi ona mos kargu ba partidu politiku OJP munisipiu Dili nian maka ida tama ona kategoria inkopatibilidade.”
Deklarasaun ne’e ho intensaun atu klarifika ba públiku nia komprensaun kona-ba deklarasaun Secretário de Estado da Comunicação Social nian ne’ebé kontein iha notísia ne’e.
Kona-ba ida-ne’e, Secretário de Estado da Comunicação Social husu atu Media Hatutan.com hala’o prátika jornalístika tuir Kódigu Étika Jornalístika, ne’ebé haktuir iha númeru 6 katak, “konfirma no verifika informasaun hothotu ne’ebe simu molok atu publika, rekoñese informasaun sira ne’ebé sala hafoin publikasaun no hadia lalais kedas, respeita sidadaun nia direitu atu hatan”.
Bazeia ba ne’e, ezije jornalista no mídia sira atu—Rekoñese no korrije lalais informasaun ruma ne’ebé sala hafoin halo publikasaun; Respeita direitu ba resposta, direitu konstitusionál sidadaun nian.
Atu klarifika katak, títulu nu’udar elementu xave ida hodi forma persesaun públiku. Títulu ida ne’ebé la verifika ba nia konformidade ho konteúdu no kontestu deklarasaun iha potensiál atu halo sala, prejudika fonte, no viola prinsípiu kona-ba ezatidaun no responsabilidade imprensa nian. Tanba ne’e, hadi’a títulu ida nu’udar parte ida hosi obrigasaun étika mídia ba públiku.
Bazeia ba konsiderasaun hirak ne’e maka Secretário de Estado da Comunicação Social husu ofisialmente ba Media online Hatutan.com atu hadi’a títulu ka headline hodi aliña ho substánsia, kontestu entrevista, no prinsípiu Kódigu Étika Jornalístika nian.
Secretário de Estado da Comunicação Social (SECOMS) Expedito Loro Dias Ximenes hein katak, klarifikasaun ida ne’e sei sai hanesan baze ida ba Media 𝐇𝐚𝐭𝐮𝐭𝐚𝐧.𝐜𝐨𝐦 atu halo koresaun ne’ebé proporsional no responsavel tuir Kódigu Étika Jornalístika nian. SECOMS afirma ninia kompromisu atu kontinua kolabora ho mídia ho espíritu profisionalizmu, ezatidaun, no respeitu ba étika imprensa ba interese públiku.
Nota korresaun ne’e fó sai husi Secretaria de Estado da Comunicação Social (SECOMS) Expedito Loro Dias Ximenes, iha Kuarta-Feira, loron 14 fulan-Janeiru tinan 2026, iha Gabinete SECOMS, Palasiu Governu, Dili. REMATA
Comment