DILI (MÍDIA SECOMS) — Sekretaria Estadu Komunikasaun Sosiál (SEKOMS), fahe ekipamentu operasionál ba Rádiu Komunidade Fronteira Balibo 5. Serimónia entrega ne’e hala’o iha eskritóriu SEKOMS iha Palásiu Governu Dili, fulan Janeiru tinan ne’e.
Asisténsia ne’e kompostu husi laptop rua, ne’ebé fornese hodi apoia nesesidade téknika no operasionál husi emisora komunitária iha fronteira. Entrega simbóliku ne’e hala’o husi Sekretáriu Estadu Komunikasaun Sosiál, Expedito Loro Dias Ximenes, ba Prezidente Konsellu Rádiu Komunidade Fronteira Balibo 5, Amilcar Tavares, ho prezensa diretór balun SEKOMS nian.
Fornesimentu ekipamentu ne’e tuir pedidu formál husi operadór rádiu komunidade atu hasa’e kualidade servisu tékniku no efikásia hato’o informasaun ba públiku.
Hatan ba ida ne’e, Amilcar Tavares hato’o nia apresiasaun ba Governu Konstitusional da-IX, ba sira nia atensaun ba nesesidade rádiu komunidade iha liña fronteira. Nia subliña, ekipamentu ne’ebé simu sei uza ho responsabilidade ba interese públiku no sei la uza sala ba objetivu espesífiku ruma.
Iha biban hanesan, Sekretáriu Estadu Komunikasaun Sosiál Expedito Loro Dias Ximenes subliña, papél estratéjiku rádiu komunidade nian, partikularmente Rádiu Komunidade Balibo 5 ne’ebé lokaliza iha área fronteira entre Timor-Leste ho Indonézia. Prezensa estasaun rádiu nian konsidera hanesan krusiál hodi habelar alkanse informasaun, tantu ba komunidade lokál no rona-na’in sira iha liña fronteira tomak.
Nia mós husu ba operadór rádiu komunitáriu sira atu fó prioridade ba diseminasaun informasaun ne’ebé fó apoiu ba atividade komunitária, inklui agrikultura, turizmu, no prezervasaun kultura lokál, nu’udar parte ida husi dezenvolvimentu sosiál no ekonómiku iha fronteira.
Aleinde Rádiu Komunidade Balibo 5, SEKOMS antes ne’e fornese ona ekipamentu transmisaun ba estasaun rádiu komunidade balun seluk, inklui Rádiu Matebian Baucau, Rádiu Bukoli, Rádiu Tokodede Liquica, Rádiu Same, Rádiu Atauro, no estasaun foun balun hanesan Rádiu Baguia, Rádiu Atsabe, no Rádiu Fatumea.
Comment