DILI (MÍDIA SECOMS) — Governu Portugal no Timor-Leste hametin liután kooperasaun bilaterál iha ámbitu komunikasaun sosiál liuhosi asinatura faze datoluk Konsulta Linguístika ba Jornalista sira (Consultoria Linguística para Jornalistas/CLJ). Programa tinan tolu ne’e foka liu ba hasa’e kapasidade jornalista sira no hametin uzu lian Portugés iha Timor-Leste.
Akordu ne’e asina iha Palásiu Governu Dili hosi Embaixadór Portugál iha Timor-Leste, Duarte Bué Alves, no Governu Timor-Leste, ne’ebé reprezenta hosi Sekretáriu Estadu Komunikasaun Sosiál (SEKOMS), Expedito Loro Dias Ximenes.
Embaixadór Duarte Bué Alves afirma katak, kooperasaun iha setór komunikasaun sosiál entre Portugál no Timor-Leste la’o ona iha tinan barak nia laran no oras ne’e tama iha faze ida ne’ebé estratéjiku liu. Nia subliña katak formasaun jornalista nu’udar pilár xave ba akordu ne’e, partikularmente liuhosi atividade revizaun no mentorizasaun linguístika ne’ebé hala’o hosi konsultór CLJ dezde 2016.
Tuir nia, prezensa hosi konsultór linguistíka ne’ebé serbisu diretamente ho instituisaun mídia oioin iha Timor-Leste kontribui maka’as ba hasa’e kualidade hosi hakerek jornalístiku iha lian portugés. Programa ne’e konsidera nu’udar forma konkreta ida hosi apoiu Portugal nian ba dezenvolvimentu profisionál jornalista lokál sira nian.
“Ida ne’e sai hanesan papél boot no kontribuisaun prinsipál ida hosi CLJ, ne’ebé, iha tinan balun nia laran, liuhosi revizór linguístiku ho baze permanente iha ne’e, hela ona iha Timor-Leste no serbisu iha kolaborasaun ho meiu komunikasaun sosiál oioin”, Embaixador hateten.
Embaixadór mós reafirma Governu Portugés nia kompromisu ne’ebé la’o hela atu fó apoiu ba Timor-Leste nu’udar parseiru besik, ho aprosimasaun kolaborativa ne’ebé konsistente no ba tempu naruk.
Entretantu, Sekretáriu Estadu Komunikasaun Sosiál, Expedito Loro Dias Ximenes, esplika katak faze datoluk hosi akordu ne’e ho objetivu atu hametin kooperasaun entre governu rua liuhosi programa Institutu Camões, partikularmente iha dezenvolvimentu kompeténsia lian portugés ba jornalista hosi instituisaun komunikasaun sosiál oioin.
“Asina nota kooperasaun ho governu Portugal ne’ebé reprezenta hosi Sr. Embaixador Portugal iha Timor-leste asinatura ida ba kooperasaun ba faze da toluk ba iha formasaun ho dezenvolvimentu lian portuges ba iha kolega jornalista sira hosi orgaun komunikasaun sosial, formasaun kooperasaun ida ne’e ita tama iha terseira faze ba tinan tolu tantu 2026-2029) ’’Expedito Loro Dias Ximenes esplika.
Faze datoluk hosi CLJ inklui treinamentu intensivu tinan tolu, revizaun linguístika ba serbisu jornalístiku, no kapasitasaun téknika iha área komunikasaun sosiál. Programa ida-ne’e hein atu hametin prátika jornalizmu profisionál no solidifika pozisaun portugés nu’udar lian traballu mídia nian iha Timor-Leste.
Hanesan parte hosi mekanizmu formál koperasaun nian, akordu ne’e sei lori ba Lisboa hodi asinatura hosi Prezidente Institutu Camões, Ana Paula Fernandes, hafoin remata ona faze inisiál implementasaun nian.
Kolaborasaun ida ne’e marka pasu foun ida iha relasaun bilaterál entre Portugál no Timor-Leste, hanesan esforsu ida hodi hametin setór komunikasaun sosiál, estratéjia longu prazu ida ba dezenvolvimentu rekursu umanu, no prezervasaun lian portugés liuhosi jornalizmu ho kualidade.
Comment