DILI (MÍDIA SECOMS) — Sekretáriu Estadu Komunikasaun Sosiál (SEKOMS) Expedito Loro Dias Ximenes, vizita ba estúdiu mini broadcasting Ministériu Edukasaun (ME) iha Vila Verde, Dili, iha Segunda-feira (10082026) ne’e.
Sekretáriu Estadu Ensinu Sekundáriu Jerál no Tékniku Vokasionál, Domingos Lopes Lemos haksolok simu SEKOMS iha nia gabinete servisu nian.
Objetivu prinsipál hosi vizita ne’e atu haree ho matan di’ak liu tan kondisaun reál estúdiu no ekipamentu sira, hodi fahe hanoin no idea entre Ministériu rua, liliu kona-ba dezenvolvimentu informasaun no teknolójia mídia nian. Vizita ne’e mós enkoraja Ministériu Edukasaun atu preve orsamentu hodi sosa ekipamentu modernu iha Orsamentu Jerál do Estadu (OJE) 2027.
Estúdiu mini ne’e sai nu’udar plataforma mehi ida ba Governu hodi halo ligasaun ka kontaktu diretu ho estudante, alunu no inan-aman sira iha territóriu laran tomak kona-ba polítika edukasaun IX Governu Konstitusionál.
Sekretáriu Estadu Komunikasaun Sosiál (SEKOMS) Expedito Loro Dias Ximenes sujere ba Ministériu Edukasaun atu hatama proposta sosa ekipamentu foun iha OJE 2027, ka bele liuhosi fundus kapitál menór no husu adisionál.
“Ha’u sente haksolok tebes tanba estúdiu iha Ministériu Edukasaun ne’e simples, maibé ministeriu tau importánsia hodi fahe polítika edukasaun nian ba publiku. Ha’u mai hodi haree kondisaun ekipamentu no fahe idea atu sira bele preve orsamentu sosa ekipamentu mídia ne’ebé modernu,” dehan SEKOMS Expedito Loro Dias Ximenes.
Sekretáriu Estadu Ensinu Sekundáriu Jerál no Tékniku Vokasionál, Domingos Lopes Lemos, agradese vizita ne’e no konfirma, Ministériu Edukasaun sei esforsu hodi prepara no hatama proposta orsamentu atu sosa ekipamentu foun iha tinan 2027.
Governante ne’e esplika tán, estúdiu mini ne’e uluk prodús ona materiál edukasaun iha tempu COVID-19 tinan 2021, no sei kontinua serbisu hodi fahe informasaun edukasaun ba eskola sekundária sira iha territóriu Nasionál.
Comment