Koordenadór Ofisiál Ligasaun ba Forsa Tarefa husi Sentru Integradu Jestaun Krize, Rui Maria de Araújo, iha konferénsia imprensa domingu ne’e, haktuir katak kazu konfirmadu la iha mudansa, sei mantén 24, kazu rekuperadu 6, kazu suspeitu sae ba 472, hein rezultadu 81 no kazu negativu hamutuk 367. Kazu rekuperadu 6 ne’e refere ba kazu provavel 4 no kazu pozitivu 1 ne’ebé rekuperadu no inklui 1 ne’ebé antes ne rekupera desde inisiu.
Rui Araújo explika katak kazu konfirmadu no provável ba COVID-19 iha Timor-Leste iha grupu ka “cluster” 7 hanesan tuir mai: grupu Otél Katuas iha kazu konfirmadu 16 halo ona segunda análize no hein seriál análize sira tuir mai tan, to’o hein negativu dalarua tutuir malu. Iha “cluster” ida ne’e, iha kazu provável nain 2 maka horseik rekuperadu ona; grupu Otél Fortuna iha kazu konfirmadu ida ho karga virál ki’ik-oan no kazu provável ida. Kazu rua ne’e rekuperadu hotu ona; grupu Otél Timing iha kazu konfirmadu ida. Halo ona teste no negativu dala rua tutir malu; grupu Otél Novo Horizonte iha kazu konfirmadu ida, sei nafatin halo análize seriál no mós iha kazu provável ida ne’ebé rekuperadu ona; grupu Otél Lecidere iha kazu pozitivu ida no sei nafatin halo análize seriál hodi hein negativu dalarua tutuir malu; grupu profesór portugés sira iha Liquiça iha kazu konfirmadu rua ho karga virál ki’ik no grupu profisionál saúde iha kazu pozitivu ida, agora iha izolamentu HNGV no hein rezultadu análize sérial tuir mai.
Porta-voz Sala Situasaun salienta katak profisionál saúde sira ne’ebé halo atendimentu diretamente ho kazu konfirmadu sira ka iha fatin izolamentu, normalmente halo turnu semana ida. Semana ne’e hotu, sira tama kuarentena durante loron 14. Se durante loron 14, sira la iha sintoma, sira bele fila ba uma durante semana ida, hafoin tama hikas servisu iha semana tuir mai.
Husi progresu ne’ebé deskreve iha leten, konfirma tendénsia husi nasaun seluk ne’ebé hatudu katak kazu pozitivu ho karga virál ki’ik ho kazu provável sira iha tendénsia atu hetan negativu iha tenpu badak liu, sein presiza iha tratamentu espesífiku. Sira nia ezame laboratoriál dahuluk halo entre loron 11 no 13 fulan-abril, no liu tiha loron sanulu, sira bele hetan rezultadu negativu dalarua, sira bele fila ba uma.
Rui Araújo realsa katak atividade triajén ba kazu suspeitu COVID-19 no esforsu halo vijilánsia sentinela hodi detekta se iha transmisaun iha komunidade iha munisípiu Liquiça nafatin lao hela no to’o horseik loraik, rekolla ona espésime 27 no agora hein rezultadu laboratóriu.
Tuir dadus ne’ebé atualiza husi Sala Situasaun CIGC, ema ne’ebé sei iha kuarentena ka konfinamentu obrigatóriu hamutuk 314. Autokuarentena iha munisípiu 39, 6 iha Díli, 298 iha fasilidade Governu nian iha Díli no 71 iha fasilidade Governu nian iha munisípiu.
Enkuantu, totál ema ne’ebé liu ona períodu kuarentena obrigatóriu hamutuk 1691. Husi totá númeru ne’e, 341 iha munisípiu no 1350 iha Díli.
Comment