Informasaun ne’e hato’o husi porta-voz Sentru Integradu Jestaun Krize, Rui Maria de Araújo, iha konferénsia imprensa ba atualizasaun dadus COVID-19, iha domingu ne’e.
Tuir Rui Araújo, evidénsia iha mundu tomak hatudu katak ema ne’ebé fumadór no hemu-tua-dór iha tendénsia boot liu atu tama iha kategoria kazu grave no krítiku bainhira detetadu ba corona virus.
Porta-voz ne’e explika katak, kazu grave signifika dada-i’is susar no presiza oksijéniu. Kazu krítiku signifika dada-i’is la diak no presiza uza mákina ka ventiladór hodi tulun dada-i’is. Akontese ida ne’e ba fumadór no hemu-tua-dór sira tanba iritasaun husi tabaku no alkól provoka resposta inflamasaun ne’ebé maka’as liu iha pulmaun bainhira hetan tan infesaun husi moras COVID-19 kompara ho ema ne’ebé la fuma ka la hemu tua.
Iha biban ne’e, informa mós ba públiku katak Governu ho ajénsia Nações Unidas sira iha Timor-Leste apela ba komunidade tomak atu partisipa iha kampaña ho naran “aplauzu ba Timor ninia eroi sira”, hodi hatudu públiku nia apresiasaun ba ema hotu ne’ebé hamrik iha liña de frente hodi hasoru inimigu invisível COVID-19.
“Hahu tersa-feira semana oin, loron 28 fulan-abril, semana ida dala ida iha kada tersa-feira, tuku 7 kalan, ita hotu sei basa liman rame-rame iha ida-idak nia fatin durante minutu balun nu’udár sinál apresiasau ba sira.” apela Rui Araújo.
Iha konferénsia imprensa ne’e, Rui Araújo husu ba konsumidór tua no sigaru atu evita-an hodi konsumu tua no sigaru bainhira lakohi atu hetan moras COVID-19 ne’ebé grave ka krítiku no husu mós ba sidadaun sira ne’ebé kompleta ona konfinamentu obrigatóriu bainhira sente iha sintoma karik, tenki kontakta ba númeru 119.
Comment