Sekretaria Estadu ba Komunikasaun Sosiál hala’o serimónia transferénsia poder ba Diretor foun Diresaun Nasionál Promosaun no Dezenvolvimentu Mídia Lokál (DNPDML), Paulino Kintas, sexta-feira, loron 05 fulan-marsu tinan 2021, iha Auditóriu PCM, Palásiu Governu, Dili.
Sekretáriu Estadu ba Komunikasaun Sosiál, Merício Juvinal dos Reis “AKARA”, hateten SEKOMS desidi nomeia Paulino Kintas hodi lidera diresaun foun ne’e hodi substitui Abel da Conceição ne’ebé asume fali pasta nu’udar Administradór Munisípiu Aileu tanba iha experiénsia kleur hala’o servisu iha área komunikasaun sosiál nian.
SEKOMS realsa hanesan diresaun foun presija elabora planu no programa ne’ebé diak nune’e bele dezenvolve servisu mídia la’ós de’it iha nível nasionál, maibé to’o mós iha nível munisipál.
Ezekutivu ne’e husu ba Diretór DNPDML foun atu aplika koñesimentu ne’ebé hetan ona durante ne’e iha área jornalizmu hodi dezenvolve rádiu komunidade sira iha teritóriu nasionál.
Iha fatin hanesan Diretór DNPDML, Paulino Kintas, kompromete sei halo konsolidasaun ba rekursu umanu no hadia kondisaun ekipamentu hodi asegura funsionamentu servisu iha diresaun foun ne’e.
Paulino Kintas reforsa durante nia mandatu, sei diversifika meiu komunikasaun sosiál nune’e bele kontribui ba polítika Governu nian ligadu ho desentralizasaun administrativa no poder lokál.
Comment