DILI (MÍDIA SECOMS) — Secretáriu Estadu Komunikasaun Sosiál (SECOMS), Expedito Loro Dias Ximenes ho Ministru Juventude, Desportu, Arte no Kultura (MJDAC), Nélio Isaac Sarmento, halo ona abertura ofisiál ba transmisaun direta Kopa Mundiál 2026. Transmisaun direta ne’e sei fó sai hosi Rádio Televisão de Timor-Leste (RTTL, E.P.), serbisu hamutuk ho Empreza Eto-Telkom durante fulan ida nia laran.
Expedito Loro Dias Ximenes, subliña festa Kopa Mundiál 2026 ne’e labele sai de’it nu’udar divertimentu, maibé tenke sai hanesan lisaun boot no esperansa ba joven Timor-Leste sira hodi aprende hosi futebolista mundiál sira.
“Ohin ita hotu hatene katak, hahú hosi loron 11 fulan- Juñu, ita sei asiste festa mundiál kopa futeból nian. Tanba ita-nia fuso oráriu la hanesan ho Méxiku, Amérika, no Kanadá, ita sei asiste jogu sira-ne’e iha tuku 3:00 madrugada,” dehan Expedito.
Governante ne’e haktuir tán, RTTL nu’udar host broadcaster serbisu hamutuk ho empreza Eto-Telkom hodi lori transmisaun ne’e ba povu tomak, liuliu ba joven sira ne’ebé fuan moris ba desportu. Nia mós fó ezemplu kona-ba vitória Selesaun Nasionál Under-21 (U-21) nian foin lalais ne’e iha Brunei Darussalam no Malázia, ne’ebé hatudu katak juventude timoroan iha poténsia boot.
Liután ne’e, Nia mós fó hanoin fali ba joven sira kona-ba mensajen hosi Primeiru-Ministru, Kay Rala Xanana Gusmão:
“Nu’udar joven, keta husu saida mak estadu no nasaun fó ba ita, maibé tenke husu ba ita-nia an rasik, saida mak ita kontribui ona ba estadu no nasaun ida-ne’e.” Nia afirma katak dezinvolve an iha futeból mós nu’udar kontribuisaun boot ida ba nasaun.
Iha fatin hanesan, Ministru Juventude, Desportu, Arte no Kultura, Nélio Isaac Sarmento, husu ba komunidade hotu, liuliu adeptu futeból nian, atu labele halo estrundu iha dalan públiku, maibé akompaña jogu sira-ne’e ho dame.
“Mai ita akompaña jogu sira-ne’e ho dame durante fulan ida tomak. Mai ita anima an ho talentu futebolista mundiál sira nian, ho esperansa katak alin sira bele foti ezemplu di’ak hosi sira, nune’e loron ruma jerasaun tuirmai hosi Timor-Leste mós bele marka prezensa iha Kopa Mundiál,” apela Ministru Nélio Isaac.
Serimónia abertura ne’e la’o ho haksolok tanba hetan animasaun hosi artista nasionál sira.
Eventu ne’e mós fó oportunidade ekonómika ba komunidade balun ne’ebé aproveita fa’an sira-nia produtu lokál iha resintu Ministériu Juventude, Desportu, Arte no Kultura nian.
EKIPA MÍDIA SECOMS
Comment