SEKOMS AFIRMA ATU APLIKA NORMALIDADE FOUN WAINHIRA TIMOR LESTE ATINJE ONA VASINA PORSENTU HITU NOLU (70%)

Tuir “AKARA” katak,esforsu Governu nian mak oinsá atu salva sidadun nia vida husi pandemia COVID-19, tanba iha nasaun barak hili opsaun rua entre ekonomia ho sidadaun nia vida liga ho saúde, maibé Timor-Leste hili proteze sidadaun sira nia moris di’ak kumpara ho ekonomia,tanba ekonomia sei bele rekupera, karik sidadun lakon vida sei la rekupera.
Merício Juvinal dos Reis “AKARA” hato’o lia ne’e wainhira ho Prezidenti Parlamentu Nasionál, Aniceto Longuinhos Guteres, hala’o kampania vasina kovid 19 ba populasaun iha Suku-Souro, Postu-Administrativu-Lospalos, Munsipiu-Lautem, sexta-feira, loron 22 fulan-Outubru, tinan-2021.
Governante ne’e mos husu ba populasaun sira atu nafatin kumpri protokolu husi Ministériu Saúde no Organizasaun Saúde Mundiál OMS no ikus liu tenki vasina tanba ho vasina deit mak bele salva ema nia vida no lori moris foun ba sidadun hotu.
Tanba ne’e “AKARA” husu ba ema hotu atu la bele fiar boatus ka lia falsu HOAX kona-ba impaktu negativu sei mosu wainhira simu vasina COVID-19, tanba laiha estadu ho Governu ida mak hakarak atu oho nia povu.
Ezekutivu ne’e mós husu ba públiku atu la bele espalha informasaun HOAX hodi hatauk no hamosu konfuzaun ba komunidade sira relasiona ho vasina COVID-19.
Iha fatin hanesan prezidenti Parlamentu Nasionál, Aniceto Longinhos Guterres Lopes, hateten, COVID-19 halo mundu preokupa tanba ne’e estadu liu husi oitavu Governu konstitusionál buka meius oioin hodi salva sidadaun sira husi moras ne’e.
Aniceto Guterres, mós husu ba sidadun hotu atu simu vasina hodi salva vida husi corona virus.
Iha kampana vasina ne’e, Munisípiu Laútem ne’ebé simu ona vasina doze dahuluk no doze daruak atinji ona 59,7%.
Iha kampaña vasinasaun ne’e, marka prezensa husi Sekretáriu Administradór Munisípiu-Laútem, Inspetór Ministériu Saúde, ekipa responsabilidade ba vasina COVID-19 no komunidade husi Suku-Souro sira.