Sekretáriu Estadu ba Komunikasaun Sosiál, Merício Juvinal dos Reis “AKARA”, enkoraja komunidade iha Suku-Cotamutu hodi partisipa iha vasina hodi aumenta imunidade no hadook an husi moras COVID-19.
Laútem, loron 07 fulan-Outubru, tinan 2021, SEKOMS kontinua hala’o kampaña vasina ba komunidade sira iha Suku-Cotamutu, Postu-Luro, Munisípiu-Laútem.
Iha Kampaña vasina ne’e, Merício Juvinal dos Reis “AKARA”, hateten, Governu iha prinsipiu atu haforsa Ministériu Saúde hodi hasa’e taxa ezekusaun vasinasaun iha territóriu tomak.
“Tanba Primeiru Ministru husu ba Membru Governu hotu, atu tun ba baze hodi ajuda Ministériu Saúde atu nune prosesu vasinasaun ne’e bele la’o lalais liu tan” tenik “AKARA”.
Governante ne’e mós husu ba komunidade iha suku-Cotamutu, aldeia-Etanise atu sai ezemplu ba suku sira seluk liu husi simu vasina.
Iha kampaña ne’e mós Xefe Sentru Saúde Luru, Cesário António da Silva, hato’o numeru komunidade postu-Luro ne’ebé simu ona vasina Doze dahuluk no Doze Daruak atinji ona 61.75%, sei hein tan rezultadu sei fó sai tuir mai.
Depois halo kampaña Vasina COVID-19, SEKOMS akompaña ekipa saúde Suku-Cotamutu, Postu-Luro, halo vasina ba ba komunidade sira.
Iha kampaña vasina ne’e, partisipa husi Inspetór Jerál Ministériu Saúde Munisípiu-Dili, Comandante PNTL Postu-Luro, reprezentante Administardór Postu-Luro, Xefe Gabinete SEKOMS , Xefe Suku Cotamutu-Luro no komunidade sira husi aldeia Etanise.
Comment